Mientras cu Meteo di Corsou for di diahuebs anochi a manda un alerta di codigo oranje, awe Departamento Meteorologico di Aruba a saca un alerta pa lama bruto y cual alerta ta valido te cu otro siman.
Diabierna den oranan di atardi DMA a saca un aviso pa boto chikito y lama locamente bruto cu lo drenta na vigor cuminsando awe diabierna pa 6’or di atardi y lo keda valido te diaranson 6 pm.
Segun e informe, e areanan afecta ta principalmente area di costa noordoost principalmente te noordwest. Lo tin labaderanan for di noord- noordoost produci pa un sistema di presion abou den Atlantico combina cu labaderanan produci pa horcan “Jerry” cu lo invadi awanan regional den curso di awe nochi pa weekend venidero. Esaki lo haci cu inicialmente nos costanan na noordoost te noordwest lo tin lama bastante bruto y den weekend costanan na parti zuid caminda sa ta trankil, tambe localmente bastante bruto. por spera olanan cu por yega 5 te 9 pia.
DMA ta manda un alerta pa usuarionan di facilidadnan di lama, landadonan y doñonan di boto chikito pa tene cautela principalmente cerca di e area di costanan.
Den e area net riba Aruba y na banda tin diferente fenomenonan natural den formacion. Asina por ehempel rond di e boca di Golfo di Mexico tin rond di seis diferente tormenta. Esnan grandi cu ta cumpra Almanac tur aña ta bisa tambe cu por spera Aruba te 3 dia di awacero. Sinembargo e ultimo potret di radar ta mustra cu e area ta basta limpi.
Diahuebs for di den oranan di atardi por a sinti cu tabatin algo na caminda, cu un shelo hopi scur bahando for di San Nicolas. Strena y lamper cu a dorna shelo a trece un yobida basta fuerte cu a cuminsa rond di 10’or di anochi y a sigui te den oranan di madruga. Segun e prome calculo haci na aeropuerto, a ricibi 29.8mm di yobida, mientras cu na Ponton a midi 30mm y Seroe Blanco 28mm. *Un yobida cu kisas door cu tin hopi tempo sin haya yobida, ta mustra hopi. Cifranan di aña pasa ta mustra cu e lunanan cu mas yobida tabata november (65.4mm); februari (50.4mm) y januari (31.04mm). E yobida total cu Aruba a ricibi den 2018 tabata 339.5mm.
DMA no tin un registro al dia di e cantidad di yobidanan pa luna e aña’ki. E datonan ta yega te cu april y nan tabata minimo di yobida. Di e ultimo cinco aña, pa loke ta luna di september ta custumbra di haya yobida. Por ehempel e september cu menos yobida den cinco aña tabata 2015 ora cu a haya apenas 2.0mm di yobida y e september cu mas yobida den cinco aña ta na 2016 ora cu a haya 68.3mm di yobida.
Di e yobidanan total di e ultimo cinco añanan por bisa cu e aña di mas yobida tabata na 2016 ora cu a ricibi 427.9mm y e aña cu menos yobida tabata 2015 cu 134.2mm.
Mientrastanto por a compronde cu e tormenta tropical Jerry a bira un horcan categoria 1.
