Yuda Mary Joan Foundation bende mas hopi pin posibel

Annabela Colina di Mary Joan Foundation, ta e persona encarga cu e campaña pa recauda fondo via benta di un pin. E pinta aki ta costa 5 florin y tur hende cu kier contribui cu e trabou di e fundacion aki, por cumpra y bisti e pin.

E ta un campaña di 2019 y cu cual nan kier financia un proyecto pa otro aña titula “Responsabilidad”. Pa medio di e programa aki kier conscientisa hobennan riba e importancia pa controla nan mes via “self exam” na pecho. Ta concentra riba hobennan pasobra e edad di personanan cu cancer na pecho a baha drasticamente. Antes tabata haya casonan di personanan riba 45 aña, of ora cu ta den menopausa.

Pero aworaki el a baha hopi. Tin casonan di pashentnan bou di 20 aña, cu cancer na pecho. E campaña ta encera cu ta pasa na scolnan y siña e muchanan con nan mes por haci un examen tur luna. Ta conscientisa tanto e hende muhe como e hende homber riba importancia di control. Hopi biaha, el a bisa, hende homber no pensa pero cancer na pecho ta posibel cera hende homber tambe y p’esey kier cuminsa cu e conscientisacion na hoben caba. “Mas jong bo cuminsa cu control, miho e ta. Y e hobennan por pasa e pensamento pa otro hende muhenan, manera nan mama.”

E campaña ta den luna di september y kier bende mas hopi pin posibel den e luna aki y october, cu ta e luna di conscientisacion riba cancer di pecho. E ta un luna cu internacionalmente ta tene campaña di conscientisacion riba e tema aki.

Esnan interesa pa contribui cu Mary Joan Foundation, por pasa na nan oficina na Sabana Blanco, for di dialun a pa diabierna y di 8’or di mainta pa 5’or di atardi. Si no por yega eynan, por tuma contacto telefonicamente of via di nan Facebook. Si e pedido ta pa mas cu 10 pin, nan por haci entrega di esaki.

Mary Joan Foundation tambe ta ricibi ayudo di supermercadonan, por ehempel, cu kier bira un punto di benta di e pinnan aki. Por tuma contacto cu e organisacion y yega na un areglo. Por contact nan via di tel. 5889999