Pagonan di Impuesto di vehiculo di motor ta bayendo bon, den e sentido cu e cantidad di personanan cu a cumpi ta aumenta.
Pero si wak e cantidad cu falta ainda tin cu bisa cu e ta un cantidad toch basta halto, segun vocero di Departamento di Impuesto, Meverly Romano.
Te cu diabierna ultimo tabata tin un incumplimento di 20423. Awor aki a caba di ricibi e cifranan mas nobo di diaranson, cu ta un total di incumplimento di 17410. Kiermen cu por mira cu den un paar di dia, e 20 mil a baha na 17 mil y si wak awor aki, falta un siman mas prome cu e deadline yega. Ainda por mira cu tin un cantidad toch grandi, esta e 17 mil aki cu falta pa cumpli cu e pago di impuesto. Pesey tambe Departamento di Impuesto ta recomenda su clientenan pa por fabor no warda te na ultimo, pasobra wardando te na ultimo, ta bay nifica rijnan largo, tempo di espera ta bira mas largo. E ta causa iritacion, e ta causa frustracion.
Claro un cliente por paga tambe via banco. Esey ta posibel. Pero importante ta pa e pago drenta si no mas laat cu dia 28 di Februari.
Esaki pa motibo cu despues di dia 28 di Februari, ta cuminsa haci e preparacionnan pa saca un naheffingsaanslag. Esaki ta hopi importante pa tene na cuenta. E personanan por ehempel cu no a haci pago aña pasa, a saca mas of menos 7mil naheffing, pa loke ta trata e impuesto aki. E personanan aki a haya un boet di 50% den nan cobransa.
Esey ta algo cu no ta recomendabel. Ta pidi clientenan pa no laga esaki pasa. Tene cuenta cu dia 28 di Februari ta e ultimo dia. A habri e posibilidad di pago for di December caba. Clientenan tabata tin December. Apesar cu December tabata tin dianan liber. Tabata tin tambe Januari y awo Februari, pa haci e pago.
Departamento di Impuesto ta di opinion cu ta suficiente tempo cu un cliente tabata tin pa asina e por completa of cumpli cu e deber aki.
Ta hopi importante pa haci’e. Un naheffingsaanslag no ta recomendabel. Si un cliente tin su belasting pa aña 300 florin y ta bay haya un naheffing pa e prome mita di aña, inclui 50% di boet, cual ta 75 florin cu ta bin acerca, e ora esey ta bay nifica cu e ta bay haya un naheffing di 225 florin, cu ta casi e suma di e belasting cu e lo mester a paga pa henter e aña. Ta gastonan extra cu no tin mester. Simplemente e cliente lo mester tene na cuenta cu tin un fecha final y e fecha final eynan ta yegando.
Aki un siman ta asina leu y si tene cuenta cu e fin di siman cu ta bin aki, tin Carnaval, dialuna ta dia liber tambe.
Ta cuater dia so ta resta e ora cu e oficinanan ta habri pa asina publico por acudi pa completa of haci e pago.
Categoria
E categoria cu ta mas grandi ta keda e categoria A. Den e categoria ey tin 14.840 number cu no ta paga ainda. E impuesto di e numbernan ey no ta paga. Esaki ta representa 21% den e categoria ey.
Den e 14840 tin un total di 4431 persona cu no a paga tampoco 2018. Kiermen den e 14 mil aki, tin 4431 cliente cu no tin pago di 2018. Logicamente, ora cu no completa e pago di 2018, no por paga 2019 tampoco.
Tambe tin un categoria cu toch ta un tiki halto, cual ta e brommernan. Tin 713 brommer ainda pa cual e number no tin pago riba dje y tambe e v-carnan. Ainda falta 1155 pa paga. Den e otro categorianan e ta hopi menos. Uno cu ta resalta tur aña ta e trucknan di diesel. Esunnan cu ta carga e plachi DT. Falta 244 cu falta pa paga. Tin incumplimento den e otro categorianan, pero e cantidad ta hopi abao.
Segun Romano, esunnan cu ta resalta ta e plachinan A, MFA (esta brommer) y tambe e v-carnan.
Control
Polis por cuminsa controla, pero pa belasting ta pidi polis pa wanta un rato, te ora cu e deadline pasa. Despues di dia 28 di Februari. Pero polis por controla un vehiculo na tur momento. Polis no ta controla solamente belasting, pero e ta controla riba otro documentonan tambe. Por ehempel seguro, keuringskaart, etc.
Pa loke ta trata boet pa belasting, ta pidi Cuerpo di Polis pa warda un rato pa despues di e deadline, 28 di Februari, e ora por cuminsa duna e clientenan aki un process verbaal, si acaso e belasting no ta paga.
Naheffing
Aña pasa a saca naheffing den luna di September. E aña aki no a dicidi ainda ki momento exacto e lo bay sali. Pero e no lo ta na September si mas. E lo sali mas tempran e biaha aki. E momento exacto tin cu defini ainda. Internamente tin cu dicidi riba dje. E ora ta asina leu, lo anuncia na publico.
Plachi di number
E idea ta pa sigui cu plachi di number, pa tur aña introduci plachinan nobo. Pa loke ta 2020, e intensionnan ta keda keto bay pa bin cu un plachi di number duradero. Kiermen cu lo por bay mas aña pa asina no tin mester di cambia e plachi cada aña. Pasobra cambiando plachi cada aña, ta sali gobierno hopi placa.
Den e direccion eynan kier bay. Un biaha mas tur cos ta depende tambe di e financiamento. E medionan cu bo tin disponibel pa por yega asina leu.
Pagamento online
Departamento di Impuesto tin basta cliente cu ta cumpli online. Ta por lo menos 1000 cliente. Segun Meverly Romano vocero di DIMP, a ripara un aumento den pagamento online. Ora cu bay na nan otro banda, ta ripara cu tin basta cliente ta acudi cu ta personanan cu a paga online. E unico parti fastioso ta, cu ora paga online, e cliente no por busca su plachinan mesora, sino despues di algun dia. Ora di paga online tin cu wak den sistema, si e cliente no por tin debenan atrasa. Si el a paga 2019 online, e ora ey ta bay boek e pago riba su 2018 y no riba 2019. Esaki ta tipo di controlnan cu tin cu sosode prome cu registra e pago berdaderamente riba e belasting di 2019. P’esey pagonan online ta tuma algun dia mas pa procesa den e sistema.
E cantidad ta ripara si cu ta aumenta, pa loke ta pago online.
Fecha final
E fecha final ta keda dia 28 di Februari. El a keda dicidi luna pasa, dia 31 di Januari, cu ta prolonga e termino cu un luna mas. Awo si tin cu anuncia u no ta bay tin mas prolongacion. Esaki ta bira definitivamente e fecha final.
