Le Groove ta un di e bandanan mas popular riba e isla, pa loke ta nan ritmonan unico cu ta accentua e soca. Y awo, no solamente tin e banda, pero nan tin nan propio grupo di Carnaval cual ta Pink4Life, cu sigur tin un acogida tremendo durante tur e paradanan cu nan a yega di participa.
Antoni Gario ta e motor tras di tanto Le Groove, como Pink4Life y e ta conta cu nan a cuminsa riba caya cu Pleasers and Teasers. Pero nan a haya cierto complicacionnan cu e nomber y finalmente a cambia e nomber pa Pink4Life.
Pa loke ta e trainingnan, Antoni Gario ta sali duro. Nan ta e banda pa kibra caya y nan tey pa haci mesun cos atrobe.
Normalmente Le Groove no ta ripiti cantica, pero e biaha aki nan ta bay cu algun cancion old school, canticanan nobo y tambe nan lo ripiti algun di e canticanan mas gusta pa publico.
Jouvert ta e cuki di Le Groove, caminda cu den pasado cu hopi otro banda no a participa. Le Groove si a sigui participa pa loke ta Jouvert. Le Groove ta Jouvert y Jouvert ta Le Groove.
Paradanan
Ainda tin algun luga habri pa loke ta e seccionnan di Pink4Life. Gario a splica cu den seccion di 10, den seccion di 25, seccion di fantasia, seccion di moneda y seccion di historia di moneda, tin algun luga habri ainda.
Ta trata aki di cantidadnan limita.
Cancionnan original
Hunter ta un di e cancionnan cu ta comenta cu por sali un roadjam. Gario a expresa cu pa nan roadjam, ta loke e hendenan ta gusta y ta pidi p’e. No cu roadjam necesariamente ta algo full Aruba lo scoge. Den Le Groove, den nan demografia, nan ta contento di loke nan hendenan gusta y tur aña nan tin roadjam. Nan ta scoge entre nan cancionnan pa ta roadjam di Le Groove. No ta eigenlijk compitiendo pa un roadjam general. Tin biaha loke nan ta gusta, e chippers di Le Groove no gusta.
Si wak’e bon, hopi diferente banda toch ta toca cancionnan di Le Groove. Bo ta haya cu un Le Groove 2, Le Groove 3, Le Groove 4, etc., pasobra tur banda ta baha carnaval cu e composicion y areglonan di Le Groove.
Influencia di soca
Antoni Gario ta sinti cu soca ta haci un impacto grandi pa orienta y alerta nos hendenan di locual ta soca di berdad y con e mester wordo treci riba caya.
E ta kere cu e muchanan hoben, manera Denzel, un di e otronan tambe cu a trece soca na Aruba ta Galloway. Tambe Blacky y Ashrock, ta hobennan cu a bin ta trece toch e sabor manera debe ser riba caminda.
Reaccion di publico
Le Groove tin hopi tempo ta treciendo un sabor distinto riba caya y e hendenan ya caba a custumbra cu nan ritmo y e pasion cu nan ta trece nan cancionnan riba caya. Pa Le Groove ta hopi importante pa e sigui asina.
