Relaciona cu e ultimo desaroyo politico riba nos isla. A acerca Presidente di Parlamento, mr. Juan Ady Thijsen p’asina e reacciona riba e acto di malversacion y tambe su futuro como politico. Thijsen a confirma exclusivamente na 24ora.com cu e lo participa den eleccion binidero. “Mi a bay cuater eleccion caba, esaki lo ta mi di cinco”, asina Thijsen a bisa na su salida di parlamento algun rato pasa.
E ta haya e acto di POR uno lamentabel, el a tuma nota di e situacion y a reacciona tambe. Pa Ministerio Publico cuminsa cu un investigacion, kiermen cu nan tin suficiente base y prueba, segun Thijsen. Manera ya ta conoci, tur fraccion den parlamento ta ricibi fondo p’asina cumpli cu nan trabounan diario. Ta haci e fondo pa entre otro, conseho huridico, relacion publico y of personal pa yuda e parlamentarionan.
E fondo ta sali for di cah’i pueblo y ta bay riba cuenta di un stichting cu cada fraccion tin. Den caso di POR, e stichting yama Hunto Nos Por, di cual Alan Howell ta e presidente. Tur aña e fraccionnan mester entrega un jaarrekening na Parlamento di Aruba relaciona cu e fondo cu nan ta ricibi.
Aunke cu Ady Thijsen ta presidente di e organo legislativo mas halto riba nos isla, e no ta na altura si fraccion POR a entrega esun di nan of no. El a splica cu stichting no tin nada di haber cu parlamento. E presidente ta sinti si cu e situacion aki ta touch e integridad di Parlamento di Aruba.
Ady Thijsen mes lo sigui den politica. Na prome instante e tabata duda si e kier sigui of no. El a participa den cuater eleccion parlamentario caba, pues tin diesseis aña como un parlamentario. Na final el termina bisando cu: “Mi a participa na cuater eleccion caba, esaki ta mi di cinco”, cu esaki e ta confirma su participacion n’e eleccion binidero. Por confirma tambe cu e lo afilia su mes riba lista geel.
