Diabierna ultimo Seccion di Pesca di Departamento di Agricultura, Cria y Pesca/Santa Rosa, bou direccion di sr. Byron Boekhoudt y sr. Castro Perez, coleganan di Santa Rosa a tuma na nan encargo e limpiesa di e pier di Centro di Pesca Spaans Lagoen.
Un ploeg a percura pa e limpiesa na canto di e barancanan, kitando tur yerbe y matanan cu por tabata stroba den e area di parkeo. A haci uzo di un bobcat pa plama graniet riba e suela cu tabatin buraco pa asina nivela e tereno bek, facilitando e stacionamento di auto riba e tereno.
Un otro ploeg a tuma encargo di e limpiesa den e laman di e area rond di e piernan. Aki e expertonan buceado, Byron Boekhoudt y Castro Perez, hunto cu algun otro boluntarionan, a logra trece na superficie un gran cantidad di sushi cu nan a logra saca for di den lama. Por a tuma nota cu hopi di e desperdicionan cu a saca tabata di material toxico pa nos bida marino manera, entre otro, stul di hero, bleki di aluminum, otro articulonan di plastic y palo.
Nos ta haci un apelacion na nos comunidad pa por fabor ta mas conciente cu nos medio ambiente. No tira desperdicio toxico den nos lama. Tur material no bio-degradabel cu wordo tira den nos awanan, ta un menasa letal pa nos bida marino.
Palabra di gradicimento ta bay pa coleganan di Santa Rosa cu sigur a percura pa un accion di limpiesa exitoso na e pier di Spaans Lagoen, cual a keda sumamente limpi y representabel.
Tambe un danki inmenso na Budget Marine, cu a percura pa patrocinio di e bakinan di sushi.
Pabien na tur esnan cu a uni forsa pa por a logra realisa e trabou di limpiesa na e pier di Spaans Lagoen. Aki nos ta mira un biaha mas cu union ta haci forsa!
