Den e siman aki a aresta personanan cu ta haci e trabou aki sin tin e permisonan necesario. A haci apelacion na esnan cu ta traha den e sector aki pa bati alarma cerca polis asina cu nan nota movecionnan straño.
Esey ta loke a sosode diabierna mainta. Polis tin un team special pa atende cu taxistanan pirata. Den careda di 10’or di mainta miembronan di e team special tabata tras di un auto sospechoso, cu parce tabata haciendo un transporte di Noord pa Playa. A sigui’e te den Emmastraat unda a mira cu e tabata ricibi placa for di e persona(nan). Esey tabata momento pa pare.
E personanan a declara cu a paga e persona 3 florin pa e biah’e.
Straño ta cu e persona aki di inicial I ta bisa cu tur e personanan den e vehiculo ta su famia. Pero asina mes nan a detene y transporte pa warda di polis pa investigacion. A confisca e vehiculo tambe.
Mester bisa cu no ta prome biaha su nomber a cay pa transporte ilegal.