Diamars, den oranan di mainta, polis a wordo manda den direccion di Piedra Plata, banda di Mega Stone. A sosode un accidente cu hende herida.
Polisnan di trafico cu a yega na e sitio, a pidi tambe pa unidadnan cera caminda na diferente parti pasobra autonan no tabata por a pasa.
Mester a cera caminda pa asina desvia e trafico, mirando e accidente. Dos auto tabata envolvi, un Sedan y un SUV. Un di e autonan a lora net na momento cu e otro tabata biniendo abao. Un tabata bayendo ariba y e otro abao. Ora cu e auto shinishi tabata biniendo abao, e SUV a bay lora na man robes y a dal den porta di e chauffeur di e sedan, sin pone atencion cu e auto tabata bin di ariba. Y pa e motibo ey e porta no por a habri y e persona herida den e auto, no por a sali.
Materialenwagen a wordo pidi. A presenta na e sitio y nan a logra habri e porta di tal forma cu e paramediconan di ambulance por a yuda e victima cu tabata levemente herida.
A bay cune pa hospital pa wordo atendi.
E persona no tabata di gravedad. Daño material si tabata basta. Despues di investigacion a hala e autonan for di caminda y asina por a habri caminda bek pa trafico.
