E argumentonan di palapa riba beach y derechonan rond di esaki semper tabata uno popular den pueblo cu ta surgi aki aya, specialmente ora cu algun incidente ‘bay for di man’, cual a bolbe sosode recientemente. Abogado, mr. Lincoln ‘Dello’ Gomez a splica durante programa di Enfoke cu no tur palapa ta mescos, y no ta tur stul di beach tampoco, ni tur e guestnan cu ta uza e facilidadnan ta mescos.
Tin dos tipo di palapa bandi hotelnan: esnan cu ta poni riba tereno erfpacht di e hotel, unda nan ta pone nan stulnan designa mescos e resto di e hotel pa nan guestnan. Dus, si tin un palapa riba tereno di hotel y tin stoel, den Dello su opinion, esey ta pone cu e palapa ey ta reserva p’e uzo di guestnan di e hotel cu ta haci inversionnan grandi y propaganda e facilidad ey pa nan turista.
Banda di esaki, bo tin pafo di e terenonan ey, den e ‘stroke’ entre lama y unda tereno di hotel ta caba. Durante ultimo añanan, diferente hotel a pone palapa eynan riba tereno publico. N’e momento cu bo hinca un palapa den e tera eynan, e propiedad ta pasa over pa pais Aruba. Pa motibo cu ta di pais Aruba y ta un hotel a pone, e ora ey e hotel no por tin derecho di uzo exclusivo ariba esey.
“Ora nos papia di palapa, mester tene cuenta di cua nos ta papia. Esun riba tereno di hotel, y esunnan para riba tereno publico.” Pa loke ta trata e stoelnan, e mesun cos ta conta. Bo tin e stoelnan riba tereno di hotel cu ta pa nan guestnan, ta nan a cumpr’e y nan a pone nan eynan. Banda di esey tin e stoelnan cu hotelnan ta paga gobierno pa por pone riba cierto tereno publico. Aki nan ta paga un precario. “E stoel cu hotel ta paga p’e pa pone riba beach, esey t’e stoel di hotel pa haci uzo di dje.
Awor, bo ta haya bo mes cu un otro tipo di situacion tambe. Por ehempel, tin un tent blauw cu ta cubri mas o menos 24 meter cuadra, situa na un hotel caminda un turista cu ta kedando un caminda a dicidi pa lag’e eynan pa dos siman largo. E ta bisa ta publico, pero mescos cu hotel ta paga precario pa pone un obheto riba tereno publico pa un periodo largo – y nan ta pag’e pa dia – esey tambe ta algo cu no por. “Tin cierto cosnan pasando cu por, y otro cu no por, anto e ehempel di e tent akinan ta mustra algo cu no por,” segun Dello ta comenta.
