Corte a condena un tata cu a abusa su dos yiunan na cuater aña di prizon y adicional e tin di paga dies mil florin di daño perhuicio. Esaki ta prome bes cu a duna un suma asina halto. Cu e suma aki por uza si ta necesario pa un tratamento.
mr. Desiree Croes, a representa mama di e victimanan, a splica cu hopi biaha hende no ta realisa cu como victima nan tambe tin derecho pa tin abogado cu nan. Tambe por pidi daño perhuicio. Den e caso aki e mama dje dos victimanan a acerca mr. Croes y pidie pa compañ’e. Nan a traha un peticion pa corte pidiendo daño perhuicio.
A pidi p’e muchanan haya dies mil florin y hues a bay di acuerdo pa duna e suma aki. Segun e abogado, pa prome biaha ta duna un suma relativamente halto. Esey ta significa cu den futuro e muchanan por uza e suma aki pa tratamento of cualkier cos cu ta necesario. Den e caso aki e mama mes por haci uzo dje suma pa guia di e yiunan. Logicamente den caso di abuso di mucha no ta mira e efectonan di biaha, pero e por ta despues di hopi aña. Fuera di ricibi un condena di cuater aña, e persona cu a abusa di su yiunan a hay’e tin di paga un suma di daño di perhuicio incluso e gastonan pa cubri e abogado.
Pa un cobertura mas amplio lesa e edicion di TREMPAN di mañan.
