Corte a haya Myron Bislik culpabel di intento di homicidio, esta cu el a trata di mata su mesun tata. El a golpia su tata cu un piedra, cu fiscal a yama baranca. Aunke cu e ta nenga, a haya cu su splicacion no tabata convincente.
E acusacion ta cu riba 16 di januari, 2024, el a dal su tata cu un baranca na su cara y cabes, lagand’e cu basta sla.
E mucha homber a bisa hues cu esaki no ta berdad. Si e ta admiti di a dal su tata cu mokete na e cas den Caya Butishi na Mabon. E dia ey un señora a yama Polis pidiendo ayudo urgente na un cas na Mabon. Berdad ora cu e patruya a yega, a topa cu un señora cu un baranca di piedra cu el a pone pafo.
No tabata cos di mira ora cu e polisnan a drenta paden. A topa cu plas di sanger na diferente parti di e cas, pero principalmente den cushina y den camber. A pasa via di cushina y a mira un plas di sanger y a sigui pa e camber, unda e situacion tabata igual. E homber herida mes nan a topa den un camber tira riba cama.
A constata cu e homber tabatin un corta basta grandi na su cabes, mientras cu e tabatin marca di sla (golpi) na su wowonan, horea, mordi na schouder y su lomba tabata tur rasca.
Pafo a haya e baranca, cu nan a constata tin rand skerpi y ta uno basta grandi. Mesora a yama ambulance.
Tabatin un version, cu e acusado a ripiti den corte, cu su tata a tira binager den su cara y esey ta motibo cu el a dal’e mokete. Despues di su detencion algun rato despues, a bay na e caso haci investigacion pero no a haya holo ni a topa cu boter di binager.
KICO A PASA
A tuma declaracion di e señora kende tabata na e sitio, pasobra e ta cuida e cas den dia y anochi e ta bay. E tabata cu e homber GB na e sitio, ora cu nan a tende zonido di auto cu a yega y inmediatamente despues un persona ta ranca na porta.
Na momento cu a yega na e porta, a tuma nota caba cu Myron a kibra esaki. A bis’e cu lo yama polis y el a bira agresivo. A pasa man pa un baranca di piedra cual el a dal su tata cu ne, no un pero diferente biaha, pa despues bandona e sitio.
A tuma declaracion di e tata na hospital ya cu el a interna eyden. Segun su declaracion, e no sa ki motibo e yiu por tin pa a maltrat’e di e estado aki. E lesionnan cu el a ricibi a causa cu mester a mand’e Colombia pa tratamento mas avansa. Aya el a opera su wowonan y cabes. Cu masha dificultad e por a duna un declaracion. Su bista tabata hopi malo y a mustra cu e tabata hopi “traag” den su reaccion. E por corda si cu e yiu a dal’e cuater biaha cu e baranca na su cabes. P’esey el a pidi pa prohibi e yiu di yega cerca di dje.
Un relato medico hinca den e proces-verbaal ta indica cu un di e golpinan ta cu el a fractura su cash’i wowo y sla serio na su cabes. Pa evita mas daño den e prome dianan, no por a lag’e drumi mucho y tabatin mester a lant’e cada dos ora. Ora cu a logra stabilis’e, a mand’e Colombia pa wak si por scapa su wowonan.
Un di e lesionnan tabata cu a saca su schouder for di luga y na su cara el a keda cu diferente corta.
E acusado a conta hues despues di a scucha e relato den e PV cu su tata tabata papia malo di dje y el a haya sa esaki di su omo. El a rabia masha hopi ora cu el a lesa e mensahe riba celular di su omo y a bay pa reclama su tata.
Pero e tata a tira binager riba dje, asina cu el a mir’e. E echo cu autoridadnan no a haya nada tabata pasobra e amiga di e tata a haci e cas limpi. E binager a causa cu su cara y wowonan a cuminsa pica. El a cay y ey ta caminda su tata a atac’e y el a reacciona mandando mokete, mientras cu e tata tabata purba choc’e. E ta admiti di a mord’e su tata ora cu e tabata trata di choc’e.
Di esaki no a keda ningun prueba, y e no a bay busca ayudo medico tampoco. Esaki pasobra e no tin AZV. E tabatin un tempo cortico cu el a bolbe di Boneiro unda cu e tabata biba.
Tur e slanan, e ta bisa, ta ora cu el a pusha su tata probablemente el a dal su cabes of cara den muraya y na e mesa.
E no ta desconoci pa polis pasobra aña el a maltrata un dama y a haya un condena. Y awo a bolbe hay’e den problema di violencia.
A laga Psycholoog y Reclassering traha rapport. Nan tin miedo cu e lo por cay den ripiticion. E acusado aki, segun ta para den e rapport, tin hopi rabia pasobra ta bisa su tata ta gaña y tempo e tabata chikito e tata tabata maltrat’e hopi. Di otro banda, e acusado no ta acepta cu e tin un problema. E tin hopi stress pa cosnan cu el a pasa aden tempo cu e tabata chikito. Pa e motibo aki el a dicidi di bay for di Aruba, ora cu e tabatin apenas 19 aña.
Pues resumiendo, e no tin problema mental y ta kere cu mas bien e ta sufri di “post traumatisch stress stoornis”. Esaki ta nifica cu e ta actua prome cu e pensa, pero toch ta hay’e responsabel pa su actonan. Tanto Reclassering como Psycholoog ta kere cu e mester di guia profesional.
Apesar di tur e splicacion cu Psycholoog y Reclassering a duna, fiscal ta haya cu nada no por kita na e seriedad di e delito cu el a comete. El a bati su tata cu un baranca y a lag’e cu marca y lesionnan duradero.
E “arma” uza pa maltrata su tata no tabata un cos chikito. Di loke nan a confisca, ta un piedra basta grandi, cu puntanan skerpi. Pa colmo tur e golpi ta na cabes cu por tabatin resultado fatal.
Imagina e odio grandi cu e acusado aki tin contra su tata, cu el a cana for di Rancho bay coy un bus pa yega Mabon pa enfrenta su tata. E mensahe cu el a lesa ta bisa “Myron no ta di confia”. El a pidi pa declar’e culpabel di intento di asesinato of maltrato severo. Y no por papia di defensa propio tampoco.
No a tuma nota di ningun muestra di arepentimento of duele pa loke el a haci pa cual fiscal a exigi 4 aña di cual un aña ta condicional y tres aña di prueba. Tambe a pidi pa impone e condicion cu e mester bay bou di guia di Reclassering y prohibi di yega cerca di su tata durante e tempo di prueba.
Na final hues a cera tratamento di e caso y a declara e acusado culpabel di e prome delito, esta cu su actuacion ta cu el a purba mata su tata.
El a sali for di Rancho bay e cas te na Mabon, a yega kibra porta pa drenta paden, y pasa man cu un baranca cual el a golpia e tata cu ne. No tin prueba cu e acusado mester a actua den defensa propio, pasobra no a haya ningun lastro di binager atras.
Hues tabata comparti pensamento di fiscal y a bay di acuerdo cu tur e exigencianan.
E acusado tin dos siman, despues di e fecha di e sentencia, pa entrega un apelacion si e no ta di acuerdo cu e decision aki.
