Durante luna di desèmber nos por a mira un oumento di abandono i maltrato di animalnan aki na Kòrsou. Boluntarionan i Dierenasiel no tabata tin lugá mas pa akapará e kachónan ku pushinan ku a wòrdu bandoná riba kaya òf a bira víktima di abuso.
Un fenómeno ku tambe ku konstantemente nos ta mira ta Pet shòpnan ku bende kachónan
di un manera inaseptabel den kouchinan ku apénas nan por kana i move i hasta den solo henter dia. Esaki ta algu ku mester wòrdu atendé dor di outoridatnan konserní mirando e pèrmitnan ku e Pet shòpnan aki tin. Durante tratamentu di presupuesto di 2018 luna pasa
mi a hasi un yamada dramátiko na Minister di Salubridat Públiko, Medio Ambiente i Naturalesa pa atendé ku e situashon aki di maltrato i Abandono di animal aki na Kòrsou i pa buska un solushon mas lihé ku ta posibel wardando e inisiativa di Lei pa Bienestar di Animal ku Frakshon di MAN a entrega dia 4 di òktober 2017. Aktualmente tin mas di 1000 kachó i pushi ku boluntarionan ta wòrdu kuida i NO ta tin mas espasio pa mas.
Mirando e situashon aki tambe mi a puntra Minister di GMN pa yuda fasilitá e mandamentu di e kachónan aki pa eksterior kaminda nan por haña Un Hogar i asina baha e preshon di e kantidat di kachó i pushinan ku ta wòrdu kuida pa boluntarionan. Relashoná ku esaki Parlamentario pa Frakshon di MAN sra Giselle Mc William a hasi Minister di Salubridat Públiko, Medio Ambiente i Naturalesa e siguiente pregunta nan: 1. Kiko ta e plan pa atendé ku e problemátiko di abandono i abusu di nos animalnan! 2. Kon por fasilitá e mandamentu di nos animalnan pa eksterior? 3. Kon ya bai atendé ku e manera ku Pet shopnan ta atendé ku animalnan?
