Prekke ta un homber cu ta causa basta problema y dolor di cabez pa Polis. Ademas na su cas mas biaha Polis sa bay pa duna asistencia. Den oranan di atardi Polis a bay na altura di Ex John F Kennedy School.
A drenta informacion cu un choler ta kibrando un auto para banda di caminda. Na yegada a topa cu un miembro di seguridad di CEA trahando na Departamento di Impuesto. El a splica cu coleganan ariba tabata mira con Prekke tabata kibra e auto. Nan a manda informacion abou pa chek si ta un cliente. Na yegada el a topa cu su auto destrui. A ranca wiper di e auto y tambe a causa daño na e plachi di number. Tambe a topa cu e autor di e destruccion. Tabata Prekke cu tabata drumi patras di e auto cu el a caba di destrui. Polis a tuma declaracion y a bay over na detencion tambe di Prekke. Awor e doño di e auto mester cumpra wiper bek. Polis a confisca e wiper cu a wordo kibra. Ademas di e caso aki, tin un otro caso cu a sosode riba comienso di aña.
Un huez comisario fam Y a avisa Polis di kiebro na e auto di trabou. Esaki a pasa den e area di Klip. E huez comisario Y trahando na corte a yega haya e auto para den Klip kibra. E auto mes ta un V-Wagen pero ta pertenece na corte cu a lease esaki. Polis a tuma declaracion di e Huez Comisario. Den e caso aki cu urgencia lo coy e boter di Night Train usa den e kiebro pa manda esaki Hulanda y analiza e vinger afdruk. Mirando cu ta un zona di Prekke, ta sospecha cu ta Prekke a comete e acto aki. E resultadonan di investigacion riba e boter di biña laga atras lo prueba esaki.
