Na september, e di tres luna di operacion despues di lockdown, 16,818 Revenue Generating Passengers (RGPs / Pasaheronan cu ta genera entrada) a biaha for di Aeropuerto Internacional Reina Beatrix (AUA Airport) pa diferente destinacion. Esaki ta 23% menos cu augustus 2020. Na september14,713 pasahero a biaha pa Merca, otro 1,663 pasahero pa Europa y74 pasahero pa Antia Hulandes. E ultimo mercado ta permiti solamente biahamento esencial tuma luga mirando cu frontera cu Curacao y Boneiro ta cera. Tambe 368 pasahero a sali riba vuelonan humanitario pa destinacionnan den Latino America y Caribe. E cifranan di september 2020 ta 27% menos di loke a premira pa e luna aki y compara cu 2019 aeropuerto di Aruba a yega na solamente 19% di e cifranan di september 2019.
E averahe di load factor (LF) pa salida (cantidad di asientonan ocupa abordo di un avion na momento di sali for di AUA Airport) ta 59% pa e mercado Mericano, raporta entre 1 pa 30 di september 2020, mientras e LF pa e mercado Europeo tabata 41%.
Durante september, AUA Airport a procesa un averahe di 7 vuelo pa dia, esaki compara cu e averahe di e mesun luna aña pasa. Pa october 2020 aeropuerto ta premira cu lo procesa aproximadamente 26,500 pasahero cu lo sali for di Aruba. E calculacion aki lo por wordo afecta mirando e restriccion di biahamento cu ainda tin actualmente pa paisnan Europeo, di Antia Hulandes y Canada. E hecho cu fronteranan ainda no a habri pa paisnan Latino- y Centro Americano tambe lo tin su efecto. Asina mes, e comunicado di aeropuerto ta bisa, nan ta pronostico cu e luna aki nan lo haya aproximadamente 30% di loke tabata e cifranan di october, 2019. Bisa di otro forma, e ta 70% menos cu e cifranan di october aña pasa.
E restriccionnan cu ta cambia constantemente riba biahamento, for di ceramento di frontera pa restriccionnan di cuarentena obligatorio na regreso di e pais for di unda a biaha pa Aruba lo por afecta e cifranan di e ultimo kwartaal di 2020. Tin varios otro factor cu ainda lo bay mustra si lo tin efecto riba airlift, por ehempel e “CARES Act” na Merca, mas restriccion di cuarentena obligatorio den otro estadonan di Merca y e hecho cu un segundo of asta un tercer ola di COVID mundialmente ta wordo spera.
Asina mes aeropuerto ta keda cautelosamente optimista pa e ultimo 3 lunanan di operacion pa 2020 ora cu drenta temporada di mas druk di aña, e temporada di winter,” asina CEO di Aruba Airport Authority N.V. Mr. Joost Meijs a bisa.
Basa riba e ultimo indicacionnan ta wordo spera cu aeropuerto lo termina e aña recuperando 37% pa- 40% di trafico di salida compara cu fin di aña 2019.
