Recientemente a tuma luga firmamento di un acuerdo entre Minister di Sector Primario, Chris Romero, Santa Rosa y WEB Aruba pa adapta un tarifa special di awa pa cunukeronan y criadonan di bestia por sigui eherce nan trabou optimalmente. Esaki ta algo cu cunukeronan semper a boga p’e, pero ningun gobierno a regl’e pa nan. Awor WEB finalmente a logra baha e tarifa pa cunukeronan y criadornan local di 40% riba e prijs di nan consumo di awa pa cultivo y cria.
Di e manera aki ta stimula e cunukeronan y criadornan pa cuminsa produci mas consistente cu e meta pa bira kisas por crea un negoshi y asina logra cu e sector di plantamento y criansa ta desaroya y sigui crece.
Otro factor importante di e maneho aki ta, cu e awa di WEB ta e unico awa cu por garantisa su calidad y cu e no ta contamina, cual ta haci cu e ta bira mas facil pa hotel y restaurantnan tambe por cumpra for di nan.
Pa loke ta esunnan cu tin plantacionnan chikito na cas mes, considera como “Hobbyist”, tin opcionnan pa nan tambe bin na remarca pa un tarifa special di awa pa planta. E grupo aki tambe mester un apoyo como cu nan tambe tin un rol importante, ya cu nan ta produci pa nan famia y di un forma indirecto ta aporta na menos importacion di cuminda. Y door di mantene e grupo aki motiva pa planta, nan por semper opta den futuro pa bira un productor comercial.
Pa e grupo di “Hobbyist”, Santa Rosa lo sigui brinda e servicio di benta di awa di dam y pa esunnan cu toch ta prefera di uza awa di WEB, nan ta bin na remarca pa un Landbouw Meter. Esaki sin duda ta un logro importante y beneficioso pa e Sector Primario di nos isla cu lo amplia e bentana di oportunidad pa nos agriculutornan y criadornan local.
