Locual nos a informa e siman aki den forma di primicia, ta cu hunta di directiva di WEB Aruba NV y Utilities Aruba NV no tin confiansa mas den e directornan di WEB y a manda yama nan pa un reunion di Algemene vergadering van Aandeelhouders (AVA) pa termina nan relacion di trabou. Sinembargo ambos director a sali di vakantie pa cual a move e fecha di reunion pa dialuna awo. Pero prome cu e dia di reunion, ya abogadonan a sinta na mesa adelanta e decision y por lo menos un di e directornan a acepta e pakete riba mesa. Abogado mr. Chris Lejuez a bisa nos: “Mi cliente a bay contento”, refiriendo na e director general Luis Oduber cu desde mañan 1 di augustus 2021 no ta director di e compania mas.
E director ta cobra 22 mil florin pa luna pero ta cobra 15 luna pa aña. Na tur e tin un salario di 333 mil florin pa aña y den su contract ta stipula cu mester pag’e dos aña si kier kit’e. Riba dje e tin 21 aña di servicio, pa cual mester pag’e su cesantia y e pensioen du WEB ta pagando p’e anualmente. Den pasado, e director saliento Oslin Boekhoudt a demanda WEB casi 1.5 miyon florin pa el a bay, pero hues no a honr’e. Cuanto e “golden handshake” aki di Luis Oduber lo costa WEB, ta keda un secreto entre partidonan.
Randolph Ruiz tambe mester bay pero su abogado, mr. David Kock, a confirma cu nan si no a haya un deal ainda cu e no por nenga. Nan no tin pura y si WEB no bin cu un miho oferta den e weekend aki, anto dialuna nan lo presenta trankil na e reunion di AVA y lo bataya den corte pa derecho di Ruiz. Esey ta precisamente locual Utilities Aruba NV no ta desea pasobra e no ta cumbini gobierno politicamente. Kisas esey mes lo sirbi como un motibo pa yega na un acuerdo pafo di corte y prome cu e reunion mes.
Pa un cobertura completo, lesa e edicion di TREMPAN di awe.
