Diabierna tabatin un bunita concierto despues di tres siman di campamento cu a tuma luga na International School of Aruba. Alice van Romondt, vice-presidente di Prins Bernhard Cultuurfonds, cu ta maneha e comision di fondo riba nomber di Eduardo de Veer, a comenta cu ta di elogia e forma con e muchanan a hinca nan curason den tres siman di e Summer Music & Performance Camp.
A bin cu e idea pa crea esaki door di musiconan profesional, manera Kyle Winklaar, Chris Kross y tambe Pearl Dumfries, como tambe docente di theater design, Indra Stamper. Sa cu muchanan despues di un periodo fastioso di COVID, nan mester di creatividad, musica y deporte, cu ta eleva nan y ta un outlet pa nan. A pensa pa haci e combinacion.
Sinembargo Alice van Romondt no a kere nunca cu e musiconan a gara e proyecto aki y trece loke a sosode diabierna mainta. “Ta algo simplemente emocionante”.
E fondo riba nomber di Eduardo de Veer a subsidia gran parti di e proyecto y a otorga beca hunto cu Cede Aruba y algun otro patrocinado cu kier a keda anonimo.
E muchanan mes a puntra caba kico nan lo haci otro siman. Ta pa e motibo ey mes a pensa pa haci e campamento mas largo. Pero pa loke ta e tres simannan aki, tabata simplemente fabuloso. E docentenan tabata hopi dedica, segun Alice van Romondt. Nan a hinca tur cos den e proyecto aki y ta depende e fondo Eduardo de Veer con nan ta evalu’e pa organis’e otro aña atrobe. Tur cos awendia ta subsidio. Pero si ta pa e fondo mes y conociendo Eduardo de Veer, sigur lo e apoya e iniciativa aki atrobe, segun van Romondt.
Eddie de Veer, yiu homber di Eduardo de Veer ta presidente di e fondo y a percura pa aloca un donacion pa por tin e campamento aki durante e ultimo tres simannan. E muchanan cu a participa a haya les den diferente materia. Un di nan tabata piano y guitara. Diabierna a mira resultado di e proceso.
Eddie de Veer a enfatisa cu Prins Bernhard Cultuurfonds a acerca nan pa contribui cu fondo na e campamento. Fondo Eduardo de Veer a pone un pianolab disponibel pa muchanan por desaroya den e disciplina di piano. A haci un conexion cu e muchanan, vooral cu tabatin tres siman pa haya les, pa por a presenta dilanti di un audiencia, wanta e ritmo y cumpli cu e tarea como un musico, no ta algo cu ta facil.
Tin cu bisa cu e muchanan, despues di tres siman, a logra presenta na un nivel halto, algo berdaderamente di aplaudi, segun Eddie de Veer.
A crea Fondo Eduardo de Veer desde aña 2018 y e ta resorta bou di Prins Bernhard Cultuurfonds. Nan meta ta pa subsidia esfuersonan y proyectonan di cultura, musica pero enfoca riba piano y violin. E fondo a subsidia diferente proyecto caba, entre otro un Pianolab.
