Aisha Esser a tende awe di fiscal di Ministerio Publico, cu e ta keda un maximo di ocho dia mas cera, pendiente e investigacion contra dje. Ta den e proceso di interogacion di e sospechoso den e caso Flamingo. Husticia ta acus’e di soborno, esta ‘omkoping’. A deten’e desde diamars dia 1 di maart ultimo y ta cera na ward’i polis di San Nicolas. Si no keda cla cu ne den e siman cu ta bin, lo mand’e KIA pa bay den detencion preventivo.
Aisha Esser a traha cu politiconan desde tempo di ex-Minister Tico Croes di AVP. Despues el a sigui cu Otmar Oduber den AVP y consecuentemente cu e mesun politico ora cu el a lanta su mesun partido, esta POR. E tabata atende publico cu yega Bestuurskantoor pa pidi fabor. E sospechoso ta awor cu e lo a tuma placa bou mesa, den forma di soborno, durante su trabou, entre 2017 pa 2019, como coordinador di ex-Minister Otmar Oduber.
Despues cu Otmar Oduber a baha como minister, su colega Marisol Lopez-Tromp no a sigui traha cu Esser. Of e no tabata haci uzo di su servicionan y mas bien el a cuminsa atende publico pa ministernan di MEP. Parce cu ex-Minister Marisol Lopez-Tromp mes tambe lo a entrega keho contra Esser, pa maniobranan dudoso, misterioso y sospechoso rond di su trabou como coordinador.
CASO FLAMINGO
Dia 24 di juni 2020, Landsrecherche (DLR) a haci varios huiszoeking en cooperacion cu RST (Recherche Samenwerkingsteam) y Cuerpo Policial Aruba y bao guia di hues-comisario. E huiszoekingnan aki tabata den cuadro di un investigacion penal di Landsrecherche tocante posibel delitonan di corupcion y otro hechonan castigabel relaciona cu otorgamento di tereno di gobierno. E investigacion penal aki ta carga e nomber codico ‘Flamingo’.
Procurador General a duna Landsrecherche opdracht na september 2019 pa cuminsa e investigacion aki relaciona cu informacion cu Ministerio Publico a ricibi di Cuerpo Policial di Aruba. Den e investigacion tin informacion tambe cu a wordo suministra na Ministerio Publico pa varios persona y organisacion. E investigacion ‘Flamingo’ ta dirigi primordialmente riba iregularidadnan den otorgamento di terenonan comercial di erfpacht den e periodo di 2017 pa 2019.
Mas concretamente bisa: e investigacion ta dirigi su mes riba e pregunta si un of mas compania a logra obtene incorectamente (un optie) riba terenonan di erfpacht den e periodo di november 2017 pa december 2019, caminda ta investiga tambe e eventual rol di e minister anterior. Den e huiszoekingnan a confisca documentonan y cargadornan di data. Di awor pa dilanti e team investigativo lo analisa e contenido di e administratie y e computernan cu a wordo tuma den beslag y lo scucha e sospechosonan y testigonan.
