Aruba Ports Authority (A.P.A.) ta na Miami unda nan ta forma parti di e delegacion di Aruba hunto cu Minister di Turismo y Aruba Tourism Authority (A.T.A.) p’e conferencia mundial mas grandi di crucero, esta e Global Sea Trade. Diaranson a sigui atende cu diferente punto importante.
Marc Figaroa, director di A.P.A., a splica cu nan tabatin un dia sumamente ocupa. A topa cu dos linea crucero importante cu ta Holland America y Virgin. Holland America ta un partner caba di Aruba y recientemente na januari nan a scoge pa bin celebra 150 aniversario na e islanan di Aruba, Boneiro y Corsou. A combersa cu nan riba con e prome temporada a bay, e tabata uno positivo.
E di dos tabata Virgin, cual tabata un hopi exitante. Motibo tabata cu esaki tabata prome bes cu nan a completa un temporada, cuminsando na januari. E resultadonan tabata uno positivo y e linea crucero ta hopi satisfecho cu Aruba. Como destinacion y waf, Aruba a score como un di esunnan miho den Caribe. Esey ta algo satisfactorio pa tende.
Hopi reunion
Tambe e partnernan tabata pidi pa tene reunion cu A.P.A. pa papia riba proyecto, short power ta keda un topico hot unda tin hopi interes pa introduci esey. Ta papia di inversion grandi, no ta algo cu Aruba so por hacie pero ta mira ki t’e miho forma pa ehecuta algo asina. E industria tin su vision, pero e siguiente cero pa 2050. Desde awo te cu 2050 nan tin di traha pa mehora y opera di un manera mas sostenibel.
Mas call
E linea crucero Virgin a anuncia cu pa 2025 Aruba lo haya mas call, pero den zomer tambe. Segun Figaroa, esey ta sumamente satisfactorio cu ta tene e noticia aki. Esey ta unda cu kier crece un poco mas.
Mario Arends, manager di comercio di A.P.A., a indica cu diaranson nan a culmina e di tres dia di conferencia di Global Sea Trade hopi satisfecho. E reunionnan tabata bon, a haya bon comentario. Un di e highlights cu a mira tabata e desaroyo di Puerto Rico. Puerto Rico ta un destinacion di waf importante pa Aruba, debi con cerca e ta di Aruba. E ta un punto di waf cu lo por yuda, mirando cu distancia pa Aruba ta mas cortico cu esun di Miami pa Aruba. Esey ta algo hopi positivo y ta mira un desaroyo hopi bon.
Hopi expectativa
A mira cu mas crucero ta haciendo uzo di Puerto Rico como un home port y di e plannan comparti cu APA, segun Arends, esaki lo mehora mas. E comentarionan ta hopi bon. Tin hopi expectativa pa Aruba. Nan ta mira cu Aruba ta e isla cu por sigui step up den diferente aspecto. Short power ta un di nan y ta mira cu Aruba ta un di e islanan cu por yega na esaki. Tambe den sigui eleva e calidad di experencia tanto na waf como den destinacion. Un di tres dia hopi druk y productivo.
Awe ta e ultimo dia di e conferencia Global Sea Trade y esaki no ta henter dia. Nan ta bay tin reunion di meet the planner. Esaki ta reunion hopi cortico y eynan APA ta probecha di topa cu hopi e lineanan crucero cu nan no tin hopi contacto regularmente. Tambe lo enfoca riba e lineanan crucero poco mas chikito. Nan ta bay tene reunion cu Four Seasons Yachtclub, cual ta un linea luhuso cu a anuncia Aruba ta den nan iterinario.
A.P.A. ta contento cu esey y kier keda mantene contacto cu nan, sigura di ta prepara pa duna e tipo di servicio na waf. Tambe como destinacion di e tipo di servicio cu e pasaheronan aki ta spera di haya. Nan ta tipo di pasahero afluente y mas exigente. Nan tin un total di ocho reunion asina aki.
