Diahuebs tabata un dia special p’e mundo social riba nos isla. Ta p’e simpel echo cu a inaugura e edificio di Stichting Hunto den Caya Appeldam. Stichting Hunto ta relativamente nobo, a uni Fundacion pa Maneho di Adiccion di Aruba y Sociaal Psychiatrische Dienst y hunto a bira Stichting Hunto.
A join p’asina por atende cu e problema bou un solo capa, por lo menos esey Dalgis Montalvo, director di Stichting Hunto a comenta. Actualmente Stichting Hunto ta conta cu casi ochenta personal. Un edificio asina ta hopi importante pa Aruba. Lo atende e problema di adiccion y salud mental bou di un solo dak.
Randall van Trigt ta Presidente di Hunta di Supervision, el a conta cu Stichting Hunto ta bin di un pasado hopi scur pa cual nan tabatin e mester di e ayudo. P’esey a funda Stichting Hunto. Mitar di e edificio ta asigna pa atende cu mucha pa cual e ta bin cu su propio speeltuin. A dura dos aña pa construi e edificio. E ta un desaroyo importante p’e pueblo y Aruba.
Minister Rocco Tjon ta encarga cu e cartera di Asuntonan Social, den un combersacion cu 24ora.com el a conta cu; e ta contento y orguyoso di henter e ekipo cu a traha pa a haci esaki posibel. Tin un road map diseña p’asina riba diferente area atende cu diferente aspecto pa cu salud mental y problema cu adiccion. Entre nan, legislacion, maneho, cuido y personal. Cuido pa cu adiccion y salud mental ta bira mucho mas accesibel cu e edificio nobo di Stichting Hunto.
