Despues di a entrega keho contra dje, Ministerio Publico a evalua e kehonan, a revisa declaracionnan haci y e pruebanan preliminar riba mesa, a tuma e decision ayera atardi pa duna ordo di detencion di e homber Sciandri Lesire. Awe mainta recherche di Jeugd en Zeden Politie (JZP) a detene na su cas. Polis a confirma su detencion y cu ta pa acusacion di pedofilia, pero mas detaye no tabata disponibel.
E organisacion TA BASTA a publica riba nan pagina di Facebook, cu segun nan informacion, cu ta for di cuater aña pasa caba a drenta no un ni dos, sino tres keho pisa contra e homber aki. Tur keho tin di haber cu sea a abusa sexualmente of di comportacion indebido cu menornan di edad. Ta papia aki di dos mucha muhe y un mucha homber. TA BASTA a skirbi di ta spera pa e sospechoso por haya un bon castigo y cu e muchanan y nan famia por haya ayudo profesional.
Pa famia di Sciandri Lesire, e noticia aki a cay di sorpresa. Esaki pasobra e nunca ta cana cu mucha, sino mas bien ta un hoben masha contento semper, yena di amigo y conocinan, pero nunca den ambiente di mucha. E mes tin un yiu muhe chikito cu ta atendiendo kleuterschool. E y e mama di su yiu a dicidi pa laga otro, pero desde e tempo ey e mama ta priv’e di por mira su yiu, etc. Nunca a menciona nada di abuso, sino mas bien ta mustra un guera amoroso di pareha, uzando e yiu memey.
Tambe ta insisti cu Sciandri tin un pareha nobo, un juffrouw di scol y nan ta bayendo masha bon cu otro, sin problema. Pues, di unda ta sali keho asina, nan mes no sa. Mama di e sospechoso ta traha pa hopi aña den un organisacion netamente pa mucha, pues ta un persona cu masha experencia profesional con pa atende cu mucha.
Mester menciona cu e tema di abuso di mucha ta halto awendia den prioridadnan cu comunidad kier mira un cambio y un solucion pa evita ripiticion. Pueblo ta pone hopi presion riba gobierno, autoridad y parlamento, pa baha cu “man pisa” contra abusadonan, specialmente esunnan cu ta afecta bida di mucha. Como tal, mester por duna autoridad espacio pa por haci nan trabou di investigacion y pa duna tur caso y keho e balor necesario pa verifica su e mucha tin rason, si tin prueba of si ta un keho falso. Pero no por kita derecho di un mucha riba proteccion y tampoco di ningun mama pa sali na defensa di nan yiu.
Mientrastanto e sospechoso ta den proceso pa busca abogado pa defende su caso pasobra e ta para riba su inocencia. Polis lo mester verifica esey den e siguiente dianan, segun e proceso di interogacion y confrontacion cu declaracion y pruebanan lo tuma luga.
