E hoben Nahshon Smith ta den man di husticia y lo mester responde awo pa acusacionnan serio di Husticia contra dje. Ta sospecha cu e lo ta un di e autornan intelectual di atraco arma riba restaurant y supermercadonan Chines di e ultimo simannan aki. A logra localis’e awe y riba ordo di Fiscal a detene mesora y hib’e Warda di Polis unda e ekipo di recherchenan elite di “Atraco Team” tabata cla sperando riba dje pa start cu interogacion.
Un recherche pensiona a conta nos cu hopi biaha, di experiencia di pasado, asina cu Polis cuminsa detene e sospechosonan, cu mesora lo nota un caida den casonan di atraco. Esey ta indica cu, hopi biaha, ta e mesun gruponan di hoben ta envolvi den sea tur of sino mayoria caso di atraco arma. Specialmente si considera e areanan unda a atraca, e “modus operandi” y e tipo di negoshinan, por conclui cu den e caso aki tampoco no ta un excepcion.
E otro realidad cu hopi ciudadano no ta para keto na dje ta, cu ultimo temponan, mayoria caso di atraco arma ta tuma luga cu sospechosonan local mes. Nos propio hobennan Arubiano ta stop di bay scol, ta prefera practica “economia facil” y ta opta pa integra den gangnan cu tin como ofishi horta of tira atraco.
Lamentablemente e “vangnet” di comunidad, pa un of otro motibo, no ta logra tuma e hobennan aki bek y laga nan integra den comunidad pa cuminsa un bida normal atrobe. Hopi ta keda den e mesun curculo vicioso y ta drenta/sali di KIA comosifuera ta un hotel nan a yega. E ta un reto social cu como comunidad mester atende cune y purba soluciona hunto.
