Pa algun dia caba a tuma nota presencia di un of mas persona cu ta actuando den forma sospechoso den Parke Nacional Arikok. Ta sospecha cu nan ta bezig ta cogiendo oro den un di e rooinan cu ta core den Parke Arikok.
A yega di acerca e hendenan aki. Parce cu ta doño di entre otro car rental, cu ta bay cu diferente auto pa asina no lanta sospecho ora cu ta bezig ta haciendo trabaonan di busca oro den Parke Arikok.
Diadomingo si nan a pone un fin na e buskeda di oro den Parke. Pa ley, ta prohibi pa saca cualkier obheto, cualkier piedra, kico cu ta, for di tereno di Parke Arikok.
E ta un area protehi. Den e caso aki e personanan aki, cual un di nan ta doño di car rental, a yega diadomingo y mesora parke su personal a actua contra nan.
A yama polis. Polis a bin. A mustra polis te unda parke Arikok ta protehi y asina bay over tambe na detencion di dos persona cu tabata hunto, haciendo e maniobranan aki di piki, aparentemente oro den parke Arikok, den e rooinan cu ta core.
E auto tambe a keda confisca. Polis a confisca e auto di e persona despues di su detencion. Ta trata di un jeep Wrangler color preto cu nan a uza pa bay na e sitio.
Esaki ta despues di basta dia caba cu nan ta bezig y nan a adverti nan tambe cu loke nan ta haciendo no mag. Pero cada biaha sea ta bin den auto diferente of ta bin den cierto orario y asina ta move den e Parke Arikok, unda cu nan tabata comete nan fechorianan cu ta prohibi pa reglanan di parke.
Un biaha mas ta manda un advertencia pa tur hende cu ta bin den Parke, cu ta prohibi totalmente. Parke ta protehi pa ley. No mag mishi cu nada y no mag di bay cu nada cu ta den parke.
