Durante un patruya regular di polis, a bin topa cu un auto marca Kia modelo Picanto color blanco, numera A-53084 para cant’i lama na Arashi. E tabata para di un forma sospechoso. Ora e agentenan policial a studia e scenario bon, a ripara cu; dos hende homber y un hende muhe tabata den pleno accion sexual.
Ora e trio a nota presencia di polis, nan a ranc’un careda, subi auto y trot bay. Polis a cuminsa persigui e auto aki, di cual riba e caminda cerca di Tres Trapi a dal contra di e patruya di polis. No mucho leu di unda nan a accidenta, a logra para pa duna cara na polis. Tur cos ta mustra cu durante e persecucion, tabata mas bien e oportunidad perfecto pa nan por bisti bek, mirando cu nan tabata den e trahe di Adam.
Berdad, ora polis a bay atende cu nan, a pidi desculpa y a bisa polis cu; a spanta ora a mira luz blauw. Polis a detene e chauffeur y a hib’e ward’i polis. E otro dosnan a keda na pia, a yama un conocir pa bin busca nan. Tabata casi 4:00 am ora cu henter e situacion aki a tuma luga. Polis di trafico a presenta pa documenta e accidente ‘ki.
