A confisca un cantidad importante di baranan di oro diadomingo ultimo na Aeropuerto Reina Juliana di Sint Maarten, den un avion priva, procedente for di Venezuela. Esaki a keda anuncia oficialmente door di Polis di Sint Maarten.
Manera ta conoci, aña pasa a start un investigacion, conduci dor di Recherche Samenwerkings Team (RST), relaciona cu transito di oro for di Venezuela pa Aruba y ta sigui pa Europa. A detene dos persona, a cera un di nan pa 4 luna largo, a tuma mas o menos 50 kilo di oro puro den beslag y te awe nada. Parce cu e caso lo no bin dilanti mas, pasobra manera nos a publica den forma di primicia, a “perde” oro y Gobierno ta deliberando awo cuanto lo mester paga pa e oro horta, cuanto e daño y perhuicio lo ta, etc. Ta cu placa du pagado di belasting lo mester bay corigi un eror cometi dor di Polisnan procedente di Hulanda.
E informe di Sint Maarten ta menciona cu un cantidad importante di baranan di oro a keda confisca diadomingo. A interoga e piloto, co-piloto y varios otro persona, sospecha di labamento di placa. E proceso, nan a bisa, mester sigui su caminda awo y no kier duna mas informacion.
Durante un control haci dia 14 di juli door di Duaneronan y Polis di Sint Maarten, a descubri e baranan aki di oro. Nan a bisa cu e documentonan di oro no tabata na ordo, consecuentemente e baranan di oro y e avion a keda confisca.
