Awe merdia pa 12:00 pm a activa unidadnan di polis y bombero pa e entrada principal di Parke Nacional Arikok, pa rescata y pa brinda prome asistencia na un persona cu a bay “hike” den e park.
Manera ta sosode tur diadomingo, gruponan grandi, consistiendo di adulto y muchanan, ta opta pa topa cu otro y dal un keiro den e park. No solamente e ta bon pa bo salud, pasobra curpa ta den movecion, sino tambe cu ya disfruta di e beyesa cu nos naturalesa tin di ofrece. Ora e grupo a yega “Rooi Fluit”, un di e participantenan, un señora, a sinti su mes malo. No sa si ta su sucu of su presion a baha.
E no tabata un rescate facil, pasobra esunnan cerca di e victima no tabatin señal pa por a haya contacto cu autoridad. Un di esunnan den e grupo mester a subi un sero pa por a haya señal pa por a yama 911 y pidi pa ayudo. Ta na momento cu a haya bombero na liña cu mesora a saca unidadnan pa brinda asistencia.
Cu ayudo di e Park Rangers a yega lihe na e sitio pa por a brinda asistencia na e dama victima. Paramedico cu a yega den e pick-up di ImSan a brinda asistencia na Rooi Fluit mes, a stabilisa e pashent y despues a transport’e pa entrada di parke Arikok, pa eynan pas’e den ambulance pa por a transport’e pa Hospital.
