Desde aña 1986, ora Aruba a bira pais autonomo den Reino Hulandes, nos Cuerpo Policial Aruba ta uza e uniform policial cu nos tur conoce. E carson deftig color blauw, e camisa blauw of blanco cu manga cortico of manga largo y esey combina cu e pechi plat. Cu tempo a bin diferente sorto di uniform acerca cu diferente unidad policial ta uza awendia.
Mester menciona cu Cuerpo Policial Aruba a dicidi pa cambia tur uniform, di tur e mas of menos 450 homber y muhenan cu ta traha y patruya riba caya. A atende directamente cu e compania cu ta cose e pañanan na Merca. A opta pa uza e marca TruSpec, mientras cu na Aruba e compania Sport Caribe a haya e trabou pa borda e logo di polis riba e poloshirtnan.
Pa motibo cu tin diferente variacion y combinacion di uniform den Cuerpo Policial a haci cu dia 29 maart 2016, mando policial di Cuerpo Policial Aruba a evalua y tuma un decision pa instala un comicion pa analisa y modernisa e uniform y imagen nobo di Cuerpo Policial Aruba.
Despues di diferente pruebanan y investigacion a resulta cu Cuerpo Policial Aruba ta cla pa introduci su imagen nobo di uniform entrante 15 maart 2021. Comunidad lo mira dos (2) diferente estilo di uniform cu patruyanan di diferente districto lo uza cu ta esun
tradicional y operacional.
Un (1) e uniform tradicional cu comunidad conoce (carson blauw cu camisa blauw of blanco cu pechi plat). E di dos (2) ta e uniform nobo di polis operacional (carson blauw scur, polo blauw scur cu geel y un pechi di baseball).
Comunidad por mira e cambio mesora entrante dialuna awo 15 di maart pa motibo cu e unidadnan manera patruyanan di Oranjestad, Noord, San Nicolas y Santa Cruz, unidad di trafico y planificacion, unidad motorisa y unidad canino (K-9 unit). Nan lo ta e prome unidadnan cu lo uza e uniform nobo operacional y tradicional. Despues e otro departamentonan tambe lo haya e uniform operacional.
Cu e introduccion di e uniform nobo aki ta yega na e decision cu ta saca tur otro uniform for di circulacion den Cuerpo Policial Aruba.
