Conecta cu bo baby durante embaraso

Como mayor bo no mester warda pa bo baby nace pa asina bo cuminsa traha riba bo conexion cu ne. Durante embaraso por ta e oportunidad perfecto pa cuminsa forma un laso cu bo baby, cual ta hopi importante pa e desaroyo di bo yiu unabes e nace.

Kico un baby ta experencia den e matriz?

Banda di e 18 siman di embaraso, e baby lo cuminsa scucha zonido di bo curpa, manera bo curason bati y ora bo bariga gruña. Na 26 siman, un baby por reacciona riba e zonidonan paden y pafo di e curpa di e mama, y por wordo calma door di e stem di e mama y tata.

Despues di 32 siman, e baby por cuminsa reconoce cierto zonido di vocal den e lenguahe cu ta wordo papia. Algun investigadornan ta sugeri cu desaroyo trempan di idioma por cuminsa prome cu e baby nace.

Baby por corda algun cos di e idioma cu ta wordo papia, y tambe cierto musica cu ta wordo toca ora nan ta den e bariga di e mama.

Maneranan cu por conecta cu bo baby durante embaraso

Aki tin algun maneranan cu por yuda abo y bo baby cuminsa forma un laso prome cu e nace:

• Papia y canta cu bo baby, sabiendo cu e por scucha bo
• Mishi y caricia e bariga
• Responde ora e baby ta scop. Den e ultimo trimester, bo por pusha e baby bek suavemente unda e baby a scop y wak si e ta responde
• Toca musica pa bo baby. Musica cu ta imita e bati di curason di bandi 60 bpm (beats per minute) ta bon.
• Duna bo mes tempo pa refleha y pensa riba e baby. Kisas bo por skirbi tur cos cu bo ta sinti y experencia.
• Haci un ultrasound. E ta un bunita experencia como mayornan pa wak bo baby move ora e ta den bariga.
• Relaha, purba di no haya stress y cuida bo mes. Segun estudio, menos stress un mama ta sinti durante su embaraso, miho pa e salud di e baby.

Con un tata por crea un laso cu e baby mientras e ta den bariga ainda

Como tata, e ta importante pa cuminsa traha riba e laso entre tata y yiu. Aki ta sigui algun ehempel con abo como tata, por traha riba bo laso y conecta cu bo baby ora e ta den e bariga di e mama ainda:

• Duna e bariga di e mama un masashi (si e mama ta permiti esaki)
• Ora e baby ta scop, sinti esaki mas hopi posibel
• Atende citanan na partera/gynocologo mas hopi posibel hunto cu e mama
• Bay klasnan prenatal. Esaki lo duna bo mas confiansa den bo mes y lo haci’e mas facil pa conecta cu e baby.
• Lesa y papia cu e baby pa e por conoce y custumbra cu bo stem
• Papia cu otro mayornan. Comparti bo sintimentonan y pensamentonan

Bo sintimentonan y e baby Kisas enbes di sinti exita pa bo baby nace, bo tin un poco stress of inseguridad. Corda cu bo sintimentonan durante embaraso por afecta e baby tambe. Por ehempel, si bo ta sinti stress, e ritmo di curason di e baby por responde na esaki y por cuminsa bati mas liher. Papia cu un persona tocante bo sintimentonan y puntra pregunta ora bo bay bo citanan di dokter/partera. Por purba di crea un netwerk di futuro mayornan pa asina boso tur por comparti boso experencianan hunto. Cuida bo salud y bo bienestar y percura cu bo relaha y descansa suficiente.

• 

• 

• 

• 

•