Diaranson mainta a tuma luga un walk-out di parti di e docentenan di Colegio Arubano, den cuadro cu e situacion cu e rector.
Diamars tabatin un reunion cu e directiva di SVOA y esey no a bay den bon ambiente. Esaki a conduci na un situacion basta tenso pa loke ta e rector cu keda pega den oficina.
Hasta a yama polis p’e situacion. Ora cu e rector a sali fo’i oficina, a informe cu lo retir’e for di su funcion.
Josephine Albertus, presidente di SIMAR tabat’ey presente hunto cu e docentenan di Colegio Arubano. Aki nan a vocifera nan mal contento como tambe duna sosten n’e rector Tim Croes.
E situacion a escala asina lihe cu a pone cu el a bay completamente fo’i man.
Durante di e walk-out por a tuma nota cu e docentenan tabata bisti completamente na preto y cu nan no lo duna les n’e alumnonan.
Albertus a comenta di a tuma nota fo’i diamars den prensa kico a sosode na Colegio Arubano cu e situacion a escala.
No ta di awo tin un situacion tenso na scol, sino e tabata fo’i aña pasa.
Den luna di juli nan a reuni cu e docentenan cu e situacion no tabata sano. SIMAR e momento ey a purba di intermedia. E docentenan a pidi p’e directiva di scol tuma nan retiro per direct.
A bin tambe un representante di Corsou unda cu a traha un MoU, bin cu diferente palabracion. Por a mira cu despues di seis luna no a yuda den e situacion y no a cumpli cu varios palabracion.
Diamars, ora cu e team a reuni pa entrega un carta, pasobra esey tabata e meta, por a mira cu e directiva di scol, na luga cu nan sinta na un manera calmo, mira kico ta pasando, a bin impulsivo, exigi y bisa e rector cu e tin cu bin den camber y cera porta. Tabata un situacion tenso, segun Albertus. E docentenan a purba di yuda, para tras di nan rector y a pusha nan tambe. Por a scucha di un docente cu a pusha porta riba su pia. Esey a buta tambe cu nan mester a yama polis, ya cu nan tabata hopi spanta. Pa despues tende, pa warda tur cos calma pa sinta, a schors e rector. Nan ta para 100% tras di nan rector. P’e motibo ey mes nan a tene e walk-out.
Pa un cobertura mas amplio lesa e edicion di TREMPAN di mañan.
