Riba 14 di october 2021, e Comite di Maneho Monetario di Banco Central di Aruba a dicidi pa sigui subi e tasa di reserva obligatorio cu 1 punto di porcentahe (esta, di 10,0 porciento te na 11,0 porciento) entrante 1 di november 2021. Pa cu esaki, a considera e siguiente informacion y analisis di maneho monetario:
- Puntonan di referencia pa monitor y mantene un nivel adecua di reserva di divisa
Pa mantene stabilidad monetario y garantisa e tasa fiho entre e florin Arubano y e dollar Americano, un nivel adecua di reserva ta esencial. Banco Central di Aruba (BCA) ta usa dos punto di referencia importante pa vigila y asegura nivelnan adecua di reservanan: e metrico di Fondo Monetario Internacional (FMI) ‘Assessing Reserve Adequacy’ (ARA) y e metrico di cobertura di pagonan riba cuenta coriente ‘current account (CA) coverage ratio’ (Grafico 1).
Figura 1. Puntronan di referencia pa nivel adecua di reserva.
Ta defini reservanan internacional como e reservanan maneha door di BCA hunto cu divisanan maneha pa banconan comercial local. En general, ta defini reservanan oficial como e cantidad di activo externo cu ta: (i) facilmente disponibel y controla pa banconan central pa asina cumpli cu e necesidad financiero riba e balansa di pago, (ii) pa sirbi como un base pa financiamento externo y (iii) pa mantene confiansa den e moneda (domestico) y den e economia. Mas aun, den nos caso cu e moneda domestico ta mara na e dollar Americano, reservanan oficial y internacional ta necesario pa mantene e tasa fiho di e florin Arubano. Consecuentemente, nivelnan adecua di reserva ta importante pa mantene stabilidad monetario y financiero.
E cantidad di reservanan oficial maneha pa BCA ta wordo considera di ta adecua ora e ta entre 100 y 150 porciento di e asina yama FMI metrico ARA. E metrico aki ta midi con adecua e nivel di reservanan oficial ta door di compara esaki cu un promedio basa riba peso di diferente factornan monetario y financiero. Esaki ta inclui e cantidad di placa den circulacion, fiansa entre companianan liga na otro, debe riba termino corto y termino largo, y exportacion di mercancia y servicio. Mientrastanto, e nivel di reservanan internacional ta wordo considera di ta apropia ora e ta surpasa e punto di referencia tradicional cu ta 3 luna di pagonan riba cuenta coriente.
- Desaroyonan monetario recien
Durante e prome tres (3) trimester di 2021, tanto e reservanan oficial como internacional a keda ariba e puntonan di referencia y pa e motibo ey a demostra di ta resiliente (Tabel 1). Specificicamente, compara cu final di december 2020, e reservanan oficial (incluyendo revaluacion di oro y reserva di divisa), a subi cu Afl. 340,8 miyon riba 24 di september 2021. Tambe, e reservanan internacional a subi cu Afl. 566,7 miyon den e mesun periodo, debi na e crecemento di e reservanan oficial ya menciona y un crecemento di Afl. 236,1 miyon den divisanan maneha pa e banconan comercial. E crecementonan observa den e reservanan oficial y internacional ta primordialmente e resultado di fiansa riba termino corto pa proposito di likides duna door di e gobierno Hulandes na e gobierno di Aruba, y entradanan mas halto relata na turismo cual a subi substancialmente desde e di dos trimester di 2021.
Tabel 1: Puntonan di referencia pa reserva 2021 periode ultimo (Fuente: BCA, 2021). | |||||||||
jan | feb | mrt | apr | mei | jun | jul | aug | sep | |
FMI metrico ARA ( porcentahe) | 108,3 | 106,3 | 102,8 | 106,7 | 106,3 | 106,9 | 111,7 | 111,0 | 121,0 |
CA coverage ratio (den luna) | 8,3 | 8,3 | 8,6 | 9,2 | 9,0 | 9,0 | 9,4 | 9,1 | 9,3 |
E nivel di reservanan oficial y internacional a yega te na, respectivamente, Afl. 2.548,7 miyon y Afl. 2.923,3 miyon riba 24 di september 2021 (Grafico 1). Consecuentemente, ta calcula cu e metrico di FMI ARA a yega te na 121,0 porciento na september 2021, mientras cu e cobertura di pagonan riba cuenta coriente a yega te na 9,3 luna. Di e manera ey, tur dos metrico tabata ampliamente riba e nivel minimo rekeri na e fin di dicho luna.
- Inflacion a keda riba tendencia di crecemento den augustus 2021
Na augustus 2021, e indice di Prijs di Consumo (CPI) tabata 1,4 porciento mas halto compara cu un aña anterior. Esaki tabata primordialmente causa pa prijsnan mas halto di gasoline, cu ta parti di e componente di transporte di e CPI (e componente di transporte a contribui cu 1,5 punto di porcentahe na e inflacion total). Di e mesun manera, e componente di vivienda a contribui cu 0,3 punto di portcentahe na e inflacion total na augustus 2021. E ultimo aki tabata pa un gran parti impacta pa prijsnan mas halto den mantencion y reparacion di vivienda cual lo tabata afecta pa subida den prijsnan di material (importa) di construccion, renobacion, y material pa mantencion. Ta premira cu e inflacion (final di luna midi contra e luna di e aña anterior) lo ta igual na 1,9 porciento na fin di december 2021 y lo baha na 1,6 porciento na fin di 2022.
E promedio anual di e tasa di inflacion a sigui e tendencia di subida cu a inicia desde april 2021 (Grafico 2). Consecuentemente, na final di augustus 2021, e promedio anual di e tasa di inflacion tabata -1,1 porciento, compara cu e nivel mas abou di -2,3 pociento na april 2021. Ta pronostica cu e promedio anual di e tasa di inflacion lo subi te na 0,5 porciento na e final di december 2021 y lo sigui subi den 2022.
- Crecemento den cantidad di likidez exesivo na banconan comercial mientras credito bancario ta baha
E cantidad di likides excesivo na banconan comercial a sigui crece na Afl. 1.580,3 miyon na augustus 2021 compara cu Afl. 1.107,4 miyon registra na december 2020. En general, e likides excesivo tabata subiendo desde e prome trimester di 2020 principalmente door di e reduccion den e tasa di e reserva obligatorio y e cambio den e asina yama ‘prudential liquidity ratio’ na maart y april 2020, cu a forma parti di e medidanan di alivio riba tereno monetario y prudencial pa asina mitiga e efectonan di e pandemia di COVID-19.
Ademas, un otro factor cu ta contribui na e crecemento continuo den likides excesivo di banconan comercial ta e falta di demanda pa credito. Specificamente, credito bancario total a baha cu 2,2 porciento na augustus 2021 compara cu december 2020. E caida aki ta primordialmente causa pa bahada den tanto credito na empresa (-3,5 porciento), como credito na individuonan (-1,8 porciento). Apesar cu a observa un crecemento den credito riba hipoteca pa vivienda (+0,2 porciento) y den e categoria ‘otro’ (+0,5 porciento), esakinan no tabata suficiente pa mitiga e caidanan den e otro componentenan di credito. E demanda debil pa credito bancario y consecuentemente su impacto riba e nivel di likides excesivo den e sector bancario tambe por ta e efecto di e aporte continuo duna door di gobierno di Aruba na empresanan. Esaki a wordo refleha den depositonan di e empresanan na e banconan comercial como cu e a crece cu 14,1 porciento na augustus 2021 compara cu december 2020.
- Anticipacion di salida di divisas relata na e revocacion di medidanan riba divisa di BCA
Apesar cu e nivel di reservanan oficial y internacional ta adecua, BCA ta anticipa un crecemento den e salida di divisa como resultado di e revocacion completo entrante 1 di september 2021 di e restriccion nan introduci anteriormente. Ta calcula cu un total di Afl. 261,8 miyon lo sali pa fin di 2021, basa riba ultimo proyeccionan.
- Decision di Comite di Maneho Monetario riba e tasa di reserva obligatorio
Considerando e nivel amplio di likides excesivo den e sector bancario, anticipando un crecemento den inflacion, e recuperacion continuo den e economia, y e salida anticipa di divisa, e Comite di Maneho Monetario (CMM) di BCA a dicidi durante e reunion teni riba 14 di september 2021 pa subi e tasa di reserva obligatorio di 9,0 porciento pa 10,0 porciento riba 1 di october 2021 (Grafico 3). Motiva pa e subida di likides excesivo na banconan comercial y e salida anticipa di divisas relata na e revocacion di medidanan, CMM di BCA a dicidi durante su reunion teni riba 14 di october 2021 pa sigui subi e tasa di reserva obligatorio cu 1 punto di porcentahe (esta, di 10,0 porciento te na 11,0 porciento) entrante 1 di november 2021.