Ex-minister presidente, Nelson Orlando “Nel” Oduber a vacuna ayera tardi na Sporthall, conoci como Centro Libertador Betico Croes, situa na Santa Cruz. E tabata compaña pa su señora, Glenda Oduber-Croes, ex-prome dama di nos pais, pa e tambe ricibi e vacuna y asina sirbi como ehempel pa tur otro tambe tuma e vacuna.
Pa casualidad, nan yiu homber, Dangui Oduber, ta e minister encarga cu maneho di salud publico riba nos isla. Dialuna ultimo hunto cu su coleganan Evelyn Wever-Croes y Minister Xiomara Maduro a tuma e vacuna. “Mi a tuma e vacuna pa proteha mi mes, cuida mi mes, mi famia y yuda crea e immunidad cu ta asina importante pa nos pais. Como minister di salud AMI ta recomenda tur hende tume. E no a haci dolor, mi ta sinti mi hopi bon y agradecido di por a tume. Aruba, ban vacuna”, asina minister Dangui Oduber a enfatisa.
Nel Oduber di 74 aña di edad ta lider honorario di Partido Movimiento Electoral di Pueblo (MEP). El a integra den e partido na aña 1975. El a bira minister presidente pa prome biaha na aña 1989 y a keda den funcion te 1994. Na aña 2001 el a bira minister presidente pa di dos biaha y a bolbe gana eleccion, aunke perdiendo asiento na 2005, pero a sigui goberna pa di tres termino como prome minister. E ta casa cu Glenda Oduber-Croes y ta tata di Glenson, Danguillaume y Nelson Jr.
