UPP a haya e oportunidad pa repasa e raport di Inspeccion cu minister di Enseñansa a uza pa publicamente degrada e docentenan di Colegio San Nicolas. UPP no por a yega na ningun otro conclusion cu: “het rammelt aan alle kanten”!
UPP no por a conclui cu tin un relacion directo entre por ehempel e reclamo di e mayornan y e control di Inspeccion di Enseñansa cu a tuma luga a base di e kehonan ricibi! E partido por a saca afo for di e raport cu ainda e mayornan no tin contesta riba nan preocupacionnan mescos tambe ni un bista riba posibel solucionnan! Tur hende ta tira culpa riba otro. E pregunta ta: Kico awor?
Kisas e rapport por ta duna espacio pa preocupacion di loke ta bin ta sosode. UPP ta kere pa cuminsa, e forma cu minister Lampe a atende cu e situacion ta uno cu ta falta tur forma di etica y tambe ta mustra falta di comunicacion. UPP ta di opinion cu mester sinta cu otro y realmente scucha di otro. “Uza e experticio cu tin na Aruba mes pa nos mes drecha nos scolnan!” Definitivamente cu un actitud di arogancia manera por a nota di parti di minister Lampe, nos no ta yega leu. No cabe duda cu aki sigur comunicacion ta importante y como tal lo tabata na su luga pa por tabata tin e wederhoor di esnan cu ta acusa prome cu a bay publico.
Mester sigui inventarisa y analisa kico tur y mas importante kico nos tur mester haci pa drecha nos sistema di educacion y asina subi esaki na normanan international. Imperativo si ta cu tur stakeholders por y mester duna feedback pa haya sa con pa drecha e desafionan cu enseñansa a bin ta confrontando pa basta tempo caba. E raport ta mustra cu claramente cu mester haci algo y continua manera te awor no ta un opcion! Mester haci algo awor y no laga e hendenan di COHO, manera cu e minister di Enseñansa a indica, bin hacie pa nos!
For di 2013 caba UPP a bin ta presenta su ideanan con pa atende cu enseñansa, na unda cu cambionan grandi lo mester bini. Pero tambe a mustra cu esaki mester sosode a base di dialogo. E transformacion di Aruba su enseñansa mester ta dirigi mas riba e necesidadnan di awendia, ya cu esaki ta keda un area di maneho cu continuamente ta den desaroyo. Pa por cope cu e cambionan, e comunicacion cu stakeholdernan ta esencial den esaki y no por adapta for di un oficina na Cocolishi so. Mas importante ta cu mester realisa cu ta haci esaki pa hubentud y e Aruba di mañan. Y ta nos so por comprende nos mes! Den enseñansa mester traha brug y no kim’e!
P’esey UPP ta kere awor mas cu nunca, nos ta na e punto pa nos por traha na un comienso nobo, na un manecer nobo, tambe den enseñansa aki na Aruba. Esaki ta loke UPP ta ofrece por medio di nan pensamento cu despues di hopi decadanan haci e cos mescos di nobo, nos bin cu un REBOOT 2.0, na unda cu por traha un miho fundeshi pa nos isla, y asina pa den algun aña reconkista nos pais! Si no haci esaki, anto esnan di COHO ta bin dicidi tambe den Aruba su enseñansa!
“E ta nos Isla, nos hubentud, nos futuro y nos responsabilidad. Nos mes mester percura pa trece e cambionan necesario pa garantisa un enseñansa di nivel. Manera Lyndon Johnson a yega di bisa: “Educacion no ta un problema. Educacion ta un oportunidad”!! Wel ban converti e “problema” aki den un “oportunidad”!,” Candelario “Booshi” Wever a bisa na final.
