Placa semper ta trece enemistad y problema. Esaki tabata e caso di diahuebs anochi laat cerca den un famia den Village y a pidi pa polis intermedia.
E hecho a sosode rond di 10.30. Polis a yega na un cas den Sint Maartenstraat pa un problema entre tata y yiu. A bin compronde eybou cu e yiu tabata den un discusion fuerte cu su tata. E ta bisa cu e tin hopi placa riba su cuenta di banco y diripiente esaki no t’ey mas. E unico sospecho cu e tin ta su tata y esey ta e motibo cu el a bay reclama su progenitor.
E tata ta sinti su mes ofendi ya cu e acusacion di e yiu no ta berdad. “T’ami ta cria e mucha,” el a bisa. E polisnan mester a papia hopi cu ambos pa trata di trece trankilidad den e cas. A conseha e yiu pa bay banco y haci investigacion.
