Dr. A.R. Lampe, Minister di Educacion, Sciencia y Desaroyo Sostenibel, pero tambe autor di diferente publicacion y articulonan den revistanan renombra, a haci entrega di parti di su publicacionnan original na Dept. Arubiana pa nos Coleccion Nacional.
E tema di e Festival di Buki di Mucha di e aña aki “Lesa y lo bo wak…” a inspira Minister Lampe pa haci donacion di su publicacionnan na e coleccion nacional pa asina nan ta accesibel pa otro investigadornan y interesadonan. Dr. Lampe tin multiple publicacion riba tereno di e.o. religion, cristianismo, politica y historia den Caribe.
Algun titulo ta “La descolonizacion interrumpida”, ‘’Mi ta djis cumpli cu mi deber’, ‘Yo te nombro libertad’, ‘Sacerdote-politico en la historia’, ‘Breve historia del cristianismo en el Caribe’, djis pa menciona. Dept. Arubiana tin e tarea di colecciona tur publicacion di autornan di Aruba y tambe tur publicacion tocante Aruba. Cu e donacion di dr. A.R. Lampe e coleccion ta un poco mas amplio y valioso. Minister Lampe a papia di e importancia di warda investigacion, idea, concepto y desaroyo pa nos pais y region pa asina despues otronan por usa e informacion pa sa mas di cualkier tema, sea riba tereno di teologia, sociologia of historia.
