Mi tin gran admiracion pa e berdadero ‘desprecio pa morto’ cu cual e partido politico POR a lansa su mes, cu wowo hancho habri, den e abismo cu e mes a coba. Den esey no ta importa cu el a bin di un sub stimacion completo di e tenacidad cu cual ‘su’ ministro di Infrastructura y Medio Ambiente (MinIM)a resisti contra ‘disciplina di partido’.
Of di un desesperacion total pa evita exposicion mas aleu di asunto aparentemente sospechoso a costo di tur cos. Echo ta cu e circo cu POR a ofrece comunidad Arubano durante e crisis mas grave den su historia, ta nifica un fin sigur di su (POR) existencia cortico.
‘Postema’
Cu e menasa di POR pa laga gobierno cay si e mocion di desconfiansa contra su ministro no haya apoyo di su partner mas grandi den coalicion, el a pone su mes den mesun posicion cu OLA tabata haci den añanan ‘90. E partido ey tabata obliga partido AVP pa ‘entrega’ na varios momento y tabata mal uza su posicion clave pa cumpli ampliamente cu su ‘obligacionnan’ cu su mes, su sponsor- y votadonan. Mescos cu awor ta e caso, y naturalmente contrario na tur posibel interes di nos Pais. Den e sentido aki, y sigur awor cu tur paña sushi a keda colga pafo extensamente, ta resulta cu POR ta un ‘postema’ cu ta haci un funcionamento drechi di e gobierno di coalicion imposibel.
E problema clave
¿Di kico ta trata realmente? Segun e ministro di Husticia y e parlamentarionan di POR, comunicacion y colaboracion ta imposibel cu e ministro concerni. Pa e ministro ‘recalcitrante’,e cantidad di caso di nepotismo, conflicto di interes, violacion di tratado internacional, negoshi cu tereno, etc. den cual e anterior y actual lider di POR y miembro di partido ta envolvi den e tempo cortico cu nan ta funciona, ta e causa principal. Y mientras e top di POR no por a produci mas cu algun keho vago tocante e ‘relacion dificil’, e MinIM por a concretisa su puntonan di forma detaya y documenta. Awor a bira cla tambe pakico su colega di partido y ministro di Husticia ta sigui blokia establecimento di e ekipo di investigacion ‘Team Bestrijding Ondermijning’ na Aruba.
Spada di Damocles
Pa e partner grandi den e coalicion, e crisis aki ta un problema grandisimo. Si e ignora e ‘ultimatum’ di POR, anto esey por nifica e caida di e gabinete, puramente pa motibo politico-oportunista di su partner di coalicion. Consecuentemente e liderazgo, di cual Aruba tin tanto mester den e crisis mas grave cu el a conoce, ta core peligro directo. Si scoge al contrario pa baha cabes pa e menasa di POR, anto ta scoge pa continuacion di colaboracion cu un partner cu obviamente a haci su mes culpabel na violacion di e puntonan clave di programa di gobierno, cu ta bon gobernacion y integridad. A cumpli si cu e exigencia di transparencia, awor cu a bira conoci con POR tabata envolvi den su propio ‘negoshinan’. Sin embargo, e ultimo escogencia aki lo tin consecuencia grave pa credibilidad di gobierno. Den e caso aki tambe lo ta trata di ‘kamikaze’. Lo mester purba bay anto den direccion cu POR ta guli su exigencia awor y despues numa ta choca cu ne tambe. Mientras tanto e partido (POR) por sinta reflexiona si no ta e ministro kiboca e kier a obliga di tuma retiro.
Modus operandi
Manera e rapport investigativo ‘Een kwestie van mentaliteit’ di e Comision di Berdad na 2002 a describi e ‘modus operandi’ maligno di e gobierno di AVP y empresario di e tempo ey den e caso di corupcion ‘Fondo Desaroyo Nobo San Nicolas’, asina aki e actual MinIM a expone e aparente manera di custumber di opera den politica, en todo caso den POR. Sin embargo, ta un pregunta te ki alcance nombracion di hende di partido den e aparato publico y otro infraccion di e criterionan di bon gobernacion a tuma luga den e ultimo tres añanan. ¿No ta asina cu e revelacionnan durante apenas un ora di e MinIM, cu solamente tabatin un par di luna den funcion, ta solamente e punta di e ijsberg? Esey lo sali na cla solamente si mas mandatario kibra fila y cuminsa revela secreto.
Revelacion
Felizmente e publico por a saboria tambe otro revelacion confidencial di parti di miembro di parlamento. Remarcabel tabata por ehemplo e expresion di e anterior ministro di Husticia di AVP. Den su discurso el a afirma cu patronahe politico y nepotismo ta forma di corupcion y por lo tanto inaceptabel. ¿Esaki tabata consecuencia di su actual papel den oposicion of di loke na Hulandes ta yama ‘voortschrijdend inzicht’ (siñamento na caminda)? Con cu ta, solamente e efecto real di e constatacion ey caba por conduci na eliminacion di un forma maligno di goberna na Aruba cu den e ultimo decadanan a costa miles di miyones.
Sigui riba e mesun pia?
E mas reciente ‘circo parlamentario’ ta e di tantisimo prueba cu e sistema di e actual ‘democracia partidario’ ta disfunciona. Den ultimo – casi – 35 aña, cara nobo y partido nobo no a trece ningun mehoracion pa e multiple deficiencianan di e ‘funcionamento politico’. Intento di mehoracion tabata parce mas bien purba lastra un cabay morto. E escala chikito di e sociedad ta preveni cu esey algun dia lo sucede. Mantene ‘cueste lo que cueste’ e sistema aki y pa falta di algo miho (?) continua cu scoge ciegamente pa partido cu ta responsabel pa e situacion den cual Aruba tabata caba prome cu e crisis di Covid, finalmente lo conduci na un ‘kamikaze’ di pueblo di Aruba mes.
