Fundacion Ajudo na Aruba #covid 19 ta purbando di yuda famianan den necesidad, esnan cu no tin suficiente placa, a perde trabou, no tin entrada mas y ta lucha pa alimenta nan famia. Nan por aplica cerca e fundacion, kendenan lo entrega cahanan di cuminda pa mas di 1 siman p’e famia pero tambe cosnan pa baby.
Despues di 1 siman cu e cosnan termina, e hendenan cu a registra lo keda riba e lista di e fundacion, segun Annelot Muijres di Ajudo na Aruba. Nan tin un lista largo di aplicacion y no por yuda tur hende. E fundacion ta trahando CEDE y otro fundacionnan. Nan ta yuda otro y ta purba yega na tur hende. El a sigui bisa cu si un famia a haya un siman caha, nan lo haya esaki otro siman tambe.
Nan ta yuda nan mes, Segun Muijres. Hendenan ta conecta cu Ajudo na Aruba via nan pagina y ta yena e formulario. Tur informacion ta riba e formulario y e fundacion lo tuma contacto. Tur siman nan ta saca 200 cuminda di Bugaloe. Tur siman ta entrega 200 caha di cuminda na cas di e famianan.
Annelot Muijres a cuminsa haci esaki na su mesun cas, unda e tabata cushina despues di a mira hopi persona den necesidad. Hopi boluntario a acerca y bis’e pa nan yuda. Nan a haya un cas como donacion pero tambe ta ricibi hopi donacion. Nan ta purba di yuda hopi famia.
Riba e fomulario e famia por pone kico nan mester, di cual tin biaha nan mester di pampers so of 1 cuminda. Nan por bisa nan simplemente kico mester y e fundacion lo duna nan esaki. Den e caha semper tin aros, berdura, fruta pa por sobrevivi y tin e cuminda adecua.
Pa haya contacto cu nan por bay riba nan website of si un hende no tin acceso na internet, pa nan bay cerca un hende pa ayudo. Yena e formulario y e fundacion lo tuma contacto pa duna asistencia. Segun Muijres, si un famia ta hayando yudansa di un otro fundacion, nan no lo duna nan e yudansa. Esaki ta pa motibo cu nan lo ricibi 2 caha y tur hende mester di yudansa. E fundacion ta purba di parti tur cos eerlijk y si nan no tin yudansa of ta ilegal pero tin miedo, nan por tuma contacto cu e fundacion y no lo haya nan mes den problema cu gobierno. E fundacion tin un bon areglo cu CEDE y nan t’ey pa yuda.