Awe merdia 3:00pm Ssrvicio Meteorologico di Aruba, METEO, ta emiti un alerta pa biento duro y lo keda valido te diabierna mainta 6:00am. Tambe un aviso pa boto chikito pa lama y specialmente areanan cerca di costa oost te noordwest lo keda na vigor te proximo aviso.
Un area di presion halto riba atlantico atrobe ta birando mas fuerte y combina cu un area di presion abou riba parti noord di Colombia lo haci e diferencianan di presion den region di Caribe mas grandi durante e proximo dianan. Biento lo supla cu mas o menos 22 te kisas 27 nudo. Ta anticipa cu lo por tin rafaganan cu de bez en cuando lo por yega 35 te kisas 40 nudo (beaufort 8). Esaki lo haci cu lama na su turno lo keda relativamente bruto na cierto localidadnan cu olanan di 6 te 9 pia halto.
Ta pidi publico pa tene cuenta cu e biento duro y specialmente na usuarionan di lama y marineronan ta urgi pa tene extremo cautela riba lama y cerca di costa ya cu e biento duro lo causa lama bastante bruto.
