Trinta luna pidi contra 3 preso pa intento di asesinato den KIA

2454

E dicho na Hulandes ta bisa “samen uit, samen thuis” y ta di e forma aki Fiscal a cataloca e rol di e acusadonan Stephan Martina, Erick Schneiders y Luis David Mejia, kendenan ta envolvi  den un caso cu a tuma luga den KIA na juli, 2019. 

Pa cada un di nan el a pidi un castigo di 30 luna pa e acusacion di intento di asesinato y maltrato pisa cometi contra e preso Jason Mathilda. 

E situacion den KIA ta hopi fastioso y algo asina por a spera hopi tempo, ta algo cu un di e acusadonan mes a bisa. Stephan Martina, kende tabata esun cu e obheto skerpi den su man, a bisa Hues: “El a mata mi tata caba, mi no ta bay warda pa e mata ami tambe.”

Di e declaracionnan duna por saca afo cu e actitud desafiante di Mathilda y e hecho cu el a grita e presonan amigo di dje pa tira e cuchiu p’e, ta loke a pone e trio den estado di alerta. Ora cu el a kita su t-shirt, manera preparando pa bringa, e trio a core bay riba dje, cu e consecuencianan ya conoci. 

Pero, Hues a mustra e acusadonan cu riba e filmacion por mira cu Mathilda tabata su so, e no tabatin nada den su man. Fiscal a dicidi di mustra e filmacion di e area di pateo, caminda por mira e victima canando, ta kita su flanel y despues e tres acusado a core bay riba dje. Despues di a tir’e na suela, nan a sut’e cu mokete, skop’e tur rond di su curpa y ta haci movecion di hincamento cu mannan. 

“Ki mishibo cu e arma y pakico bo ta cana cun’e,” e Hues a puntra Martina. Su contesta tabata: “E ta algo cu mi a haya den baño y ta traha di plastic di emchi. E cos ey no ta peligroso,” segun el a bisa. E no ta un arma cu ta mata, su Abogado tambe a bisa.

Pero tambe e acusadonan a papia cu loke a pasa “ta culpa di KIA mes” pa motibo cu Mathilda tabata su so, siendo cu den e area ey, bayendo pa e sluis, e mester ta acompaña pa dos guardia, cual no tabata e caso. “Tur hende den KIA tambe sa cu Mathilda a mata mi tata. Nos no mag ta cerca di otro y toch esey ta sosode,” e acusado Martina a reclama den Corte. 

Record penal

E victima Jason Mathilda na februari, 2010 a haya un castigo di 8 aña pa asesinato cometi (na 2009) riba Gilbert Regales (tata di Stephan Martina). Durante of despues di un discusion el a hinca Regales na su garganta cu consecuencianan fatal. E tabatin apenas algun luna afo despues di a sinta 8 aña, ora cu un biaha mas el a keda deteni bou sospecho di a comete un atraco arma riba un empleado di un pompstation, hunto cu dos otro persona, pa cual el a haya un castigo di 5 aña na december, 2019. 

Schneiders di su banda ta sintando un castigo di 14 aña, cu el a haya na 2017 pa asesinato di Ralph Palm, kende el a tira dia 21 di mei, 2017 dilanti Olde Molen. 

Stephan Claudio Martina ta sintando un castigo pa e.o. posesion di arma di candela, mientras cu Luis David Florez Mejia tabata envolvi, hunto cu Chendrik Maduro, den e caso unda cu a tira riba e hoben RC dia 21 di september, 2018. Fiscal a pidi 8 aña y Corte a dun’e un condena di 8 aña pa intento di asesinato.  

Sentencia

Despues cu Fiscal a haci su demanda di 30 luna pa e trio, y cu e Abogadonan a hiba palabra, a cera tratamento di e caso. Niun di e tres acusadonan kier a haci uzo di nan derecho riba ultimo palabra. Sentencia ta aki dos siman.