Cuerpo Policial ta investigando profundamente e caso lamentabel cu a tuma luga dialuna marduga. Pa ta exacto, pa 1:02 polis ta presenta na un cas na Monserat, caminda ta informa cu un persona lo ta den estado critico debi na un tiro di bala den cabes.
Na prome instante ta papia cu probablemente lo a tira su mes den cabes. Mesora polis a dirigi su mes na sitio, y ora a yega por a constata cu ambulance a yega na e sitio caba y tabata haci tur cos den nan alcance pa purba re-anima e victima. Un rato despues a transport’e cu urgencia pa hospital. Apesar di tur esfuerso, informe a drenta cu algun minuut despues di 3:00AM e victima a fayece. Victima tabata Michelangelo Joshua Geerman, naci 9 di december 1991.
Vocero Policial Lito Lacle a duna algun informacion adicional relaciona cu e incertidumbre den comunidad riba un supuesto asesinato relaciona cu e caso aki. Segun Lacle, un Investigacion profundo ta andando y ta den man di recherche.
Rumornan coriendo rond cu no ta trata di un suicidio y cu lo tin un otro/ of mas persona deteni cu lo a comete e acto aki no ta berdad. Lito a bisa: “Tin cu duna espacio na recherche pa traha, ta un departamento cu mi mes a bin for di dje, conhuntamente cu departamento tecnico cu a yega na sitio y a cuminsa traha mesora riba e caso”. Lo sigui procedura manera semper, prome pa haya mas evidencia cu ta posibel na sitio di crimen y pa sigura cu nan lo cuadra cu locual tin como informacion inicial.
Si ta trata di un suicidio, e evidencia encontra na sitio lo determina esaki. Si acaso ta lo contrario tambe evidencia lo mustra esey y pa es motibo ta laga investigacion cana su caminda. Si resulta cu no ta suicidio, e tin pleno confiansa den e trabou di e recherchenan di Noord, cu tin e caso, lo trece e culpabelnan dilanti
Te cu dialuna mainta, no tin informacion di persona (nan) deteni, pero informacion cu si a suministra na 24ora.com ta cu a hiba dos persona pa interogacion. Motibo di esaki tin di haber cu procedura, nan ta e ultimo dos personanan cu a wak e victima prome cu el a fayece y nan declaracion ta necesario y fundamental pa e caso.
Locual por a compronde tambe cu e area menciona no ta desconoci pa polis. Varios detencion a tuma luga algun tempo pasa caba, unda entre otro a haya varios arma di candela den un cas. Tabata tin detencion entre otro pa posesion di arma, envolvimento cu atraco y /o benta di arma. Entre nan ta trata aki di e ruman homber di e victima esta C. Geerman kende ta un persona cu un antecedente basta pisa, y cu a ricibi castigo di prizon relaciona cu e casonan menciona.
Autoridad trahando duro pa kita cualkier incertidumbre relaciona cu e presunto sucedido di un persona di edad basta hoben. Cuerpo Policial lo informa asina cu investigacion tin mas detayes y por sigura un resultado contundente.
