E siman aki Deloitte a organisa un seminario riba e ultimo desaroyonan fiscal riba nos isla. Un grupo di Fiscalista, Bankeronan y ehecutivonan den e mundo financiero a atende. Un di e oradornan invita tabata mr. Luenne Gomez-Pieters, Director di Departamento di Impuesto (DIMP) di nos pais. El a contesta varios pregunta for di sala relaciona cu e reforma fiscal cu ta implementando. Gobierno ta cla pa un di dos buelta den e reforma fiscal, programa pa drenta na vigor otro aña.
E discusion cu a surgi awor ta riba e formula cu lo uza pa cobra e fondonan adicional cu Gobierno lo kier yega na dje. Camara di Comercio a sali bisa caba di ta na fabor pa un modelo di Salex Tax mescos cu Merca. Nan ta sinti cu e formula ey lo cumbini comercio miho.
“Over smaak valt niet te twisten”, asina Director di DIMP, mr. Luenne Gomez-Pieters a contesta riba e preguna relaciona cu e preferencia di Camara di Comercio. El a subraya e hecho si cu nos tur a custuma cu BBO caba si, pues si kier cambi’e pa Salex Tax, lo mester sigui un proceso di educacion di nobo atrobe bou di comercio, DIMP y e consumidornan.
Hecho ta cu, sea cual sea e nomber cu kier duna e belasting, Gobierno mester di mas o menos 60 miyon florin otro aña pa cera e buraco den su presupuesto y pa por cumpli cu e normanan acorda cu CAft. Pa comercio e discusion no ta tanto con lo cobra pa alcansa e entradanan di Gobierno. Mas bien nan ta preocupa cu e realidad cu no ta notando ningun esfuerso serio di Gobierno pa baha nan mesun gastonan di operacion.