E ganado di e bunita suma di 1.3 miyon florin, premio di Mini Mega, a reclama su premio. Esaki tabata William Thompson.
Manera ta conoci, diabierna ultimo, 19 di juli, e premio grandi a conoce un ganado cu a cumpra su ticket na Lucky Numbers den Hendrikstraat na Playa. Dialuna prome cu merdia el a acudi na oficina i Lotto pa Deporte pa recoge su check grandi. E ganado a cumpra dos ticket loco di mini-mega plus y e tabata sa di biaha cu e tabata e ganado ya cu el a revisa su ticketnan ora cu el a tende cu tabatin un ganado y cu esaki a wordo bendi na Lucky Number den Hendrikstraat, unda cu e tambe a cumpra su ticket.
Thompson (70), un tempo tabata traha na US Customs y ta biba na Ponton hunto cu su esposa.
E numbernan ganado tabata 16-23-27-29 y Megaball 06.
Tambe tabatin un ganado di e di dos premio, kende tabatin 4 numbernan bon, pero no tabatin e Megaball. Ta trata di sra. Jolanda L., kende a gana e suma di 14.509 florin. Por a lesa e comentarionan riba Facebook di Lotto cu hopi hende ta reclama cu e di dos premio ta poco en comparacioncu e prome premio cu tabata riba 1 miyon florin. E splicacion cu a duna ta cu e premio ta subi, esta e ta progresivo. Pero e di dos premio a wordo gana varios biaha. Asina dia 2 di juli tabatin 2 ganado, dia 9 di juli 2 ganado, dia 12 di juli 5 ganado, 16 di juli 4 ganado y 19 di juli 1 ganado pa loke ta e di dos premio.
E di dos miyonario pa 2019
Esaki tabata e di dos premio miyonario pa aña 2019. E prome tabata dia 5 di april, ora cu un hungado a gana e bunita premio di Afl. 1.250.000,= na Suerte di Pos Chiquito Lottery. Den apenas tres luna, danki na e aporte y sosten di e hungadonan, ata Lotto di Aruba ta aporta cu un otro premio grandi cu ta haci un otro famia miyonario atrobe. Ta di e forma aki Lotto ta “cambiando bida” di su hungadonan.
Lotto haciendo hopi famia miyonario
Lotto di Aruba a conoce un benta di mas cu 41 miyon florin na aña 2013. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior. Cifranan di aña 2018 ta papia di un benta di mas o menos 48 miyon florin. Aña pasa varios di e premionan miyonario a cay den e districto di Noord.
Lotto ta aporta na economia y na trabou
Tin mas di 180 rebendedo di Lotto di Aruba, situa tur rond di nos isla. Lotto anualmente ta paga mas o menos 5 miyon florin na comision na rebendedonan, pues ta mira den cada un di nan un bon partner di negoshi. Separa di e mas di 110 miyon florin paga na premio e ultimo 5 añanan, Lotto ta paga comision na rebendedonan y sin lubida BBO na Departamento di Impuesto. Tur esaki ta afecta nos economia den forma positivo.
Tocante Lotto di Aruba
Lotto, e loteria di Aruba tin diferente wega manera; Catochi, Big 4, 1-OFF, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa y Gana.
Cumprando Lotto bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di un donacion di 4.5 miyon florin tur aña na e comision di subsidio.
