Bisiñanan di de Ruyterstraat, na San Nicolas, ta sumamente preocupa y rabia cu ta biniendo cu un proyecto di un crematorio.

Oscar Janga, un di e habitantenan di e bario, a splica cu a yega cera e luga y e bisiñanan no ta pasando. Nan a pensa cu ta gobierno ta bezig ta trahando un proyecto di cas, mirando cu nan tabata broma cu nan ta lantando cas aki aya. Sinembargo, a bin compronde cu ta trata di un funeraria y un crematorio. E hendenan a djis yega cera e luga, cuminsa coba, lanta fundeshi pura pura, sin avisa e bario. Tin cu avisa e bario si ta lanta algo asina. Loke a sosode no ta e manera, sin avisa nada. Awo full e bario ta contra di esaki. “No a pone nada den corant cu algo asina lo sosode.” Janga a papia cu e presidente di Club Surinam, kende tampoco no tabata na altura cu algo asina lo a bin.

Habitantenan ta bisa NO na crematorio den nan bario

Habitantenan ta bisa NO na crematorio den nan bario. Click link pa mas https://24ora.tv/2Z7afGb

Posted by 24ora on Tuesday, July 23, 2019

Dialuna nan a bin basha fundeshi lanta stof. Despues di a reclama, e trahadonan a cera e porta y core bay. Aki ta pone nan pensa cu ta ilegal ta trahando eynan.

Janga a comenta cu ta Funeraria Aurora ta bezig cu e proyecto aki y den ningun momento a acerca e habitantenan di e bario. Nan sa cu ta un funeraria ta bin eynan y tambe un crematorio, proyecta riba mapa. Y segun Janga no por bin cu algo asina den bebouwde kom.

E habitantenan, segun Janga, ta totalmente contra e proyecto aki y pa nan busca un otro luga pa construi e proyecto ey. Si lanta un cas, ta comprendibel, pero pa lanta un funeraria cu un crematorio si no ta cuadra den un bebouwde kom.

Si mester yega asina leu, nan lo tuma pasonan legal, pero ta keda na e presidente di e club. E tin e forsa pa haci’e.

El a splica tambe cu nan a manda carta pa diferente departamento compaña pa un lista cu firma di habitantenan cu ta mustra nan malcontento cu construccion di un crematorio den nan bario, area residencial.

Sonny Ho ta un musico conoci y el a biba henter su bida na San Nicolas y a conta cu e no tin nada contra si ta un funeraria, mescos cu e otro dosnan cu tin na San Nicolas caba. Pero pa traha un crematorio, mey-mey den e comunidad, ta absolutamente robes, y pio sin cu ningun hende sa di kico ta trata.

A haya tende via via cu ta bin cu un crematorio y pa Ho, no ta e miho manera pa anda cu esaki. E ta completamente robes. Ho ta comenta cu dialuna e trahadonan a core cera porta y core bay di e luga. Tin algo no ta bon. “No mester core bay si ta traha manera tur otro hende legal riba nos isla. Pakico core bay sconde. Ta di spera cu ta un contratista legal ta trahando riba e structura y no core bay pasobra periodistanan a bin mira e situacion. Nan a core sconde tur cos y core bay. Pakico core bay,” Ho, ta cuestiona.

E ta sigui comenta cu e construccion aki no ta zomaar un negoshi. E ta un negoshi respetuoso cu ta atende cu e defuntonan, nan famia, etc. No por haci algo asina memey den un comunidad cera. Ho ta pensa cu e cos aki no ta hole bon. Awo e bisiñanan p’abao di e structura, tin cu soporta tur e stof cu ta baha riba nan. Nan tin cu mantene tur porta y bentana cera y tene yiunan den cas pa motibo di e stof aki. No por traha asina, Ho ta opina.

Elvis Boekhoudt tambe ta un bisiña di e bario y ta en contra di e construccion di e crematorio. E ta sigui bisa cu loke nan ta bezig cun’e, nan por pone na Zeewijk, caminda cu tin hopi espacio. Pero e funeraria a dicidi pa bin cun’e den curason di San Nicolas, cual e habitantenan ta hopi rabia cun’e. Tur hende ta papia di dje. E tambe ta bisa cu tin algo cu no ta cuadra den e asunto aki. “E ta algo cu ta hopi fastioso. E hendenan no ta bay tin nan trankilidad mas. Tin habitante ta bisa cu nan ta bay muda, busca manera pa biba otro caminda.” E doño di e proyecto aki mes, no a bisa ningun hende nada of bisa cu e ta bin cu tal proyecto y pidi pa aprobacion. El a djis yega bin cu su proyecto.

Comments

comments