Aruba sigur a saca cara durante di e Rok Cup na Ecuador, caminda cu e hoben kartista, Matthew Paesch a logra e di dos luga.
El a comenta cu e careda a bay hopi bon. E tabata un siman na Ecuador, cual tabata basta duro p’e, cu algun fayo, pero tambe cosnan bon. Full e siman tabata up and down, den careda, den practice, den qualifying. Matthew mes tabata bao di un stress tremendo, cu hasta el a haya massage, haya pildo, pero toch na final, a haya un hopi bon resultado.
Luna pasa Matthew a cera contracto cu HR Team pa e careda aki. Nan a keda hopi contento cu e performance di dje y e mes tambe a keda contento con leu el a yega. Den Karting no ta un one man show. Tur hende ta yuda otro. Tin e mecanico cu ta respalda e coredo. Si e mecanico no haci su trabao, e ora e coredo no por perform, por ehempel. Y si e mes core fout, no ta logra gana. Tur hende mester a haci nan parti pa yega na prome of di dos luga y den e caso aki, na di dos luga na Ecuador.
Tin varios hende ta interesa den Matthew Paesch. E bon ta cu nan a logra saca e nomber pa e team y a saca nomber pa nan mes. Awo den menos di un luna, Matthew lo haya oferta pa bay cu un otro team, y core otro careda. Den e siman aki el a haya su mes ta yuda mucha pa loke ta e deporte. P’e, e ta haci todo por todo loke bin.
Matthew Paesch mes ta coriendo na Las Vegas. E ta custuma di sa di e bueltanan nobo. Esey ta loke ta yud’e hopi. Door cu e ta core hopi riba pistanan nobo, ora e yega un pista nobo, e sa kico pa haci den un buelta. E no ta yega subi pista y sa kico pa haci y sa cua skina e tin cu coy, con e tin cu lor’e. E bon di Las Vegas ta, tur cos ta cuminsa for di zero.
Na Aruba, e tin bentaha riba hopi hende. Ora el a bay Ecuador, esnan eynan tabata tin bentaha riba dje. Na Las Vegas ningun hende no tin bentaha. Ta un siman nan tin y nada mas.
Matthew ta sinti hopi bon cu el a sa si saca cara di Aruba. Na prome instante e tabata kier a sali number un, pero despues di e break, e no por a haci nada mas, djis tapa su caminda y resa pa lo miho posibel. E ta sinti basta orguyoso cu a traha riba nan propio forsa. Tur e otro teamnan a manda hende Italia, Merca, diferente caminda. Y nan riba nan propio forsa nan a saca bon cara.
Despues cu Matthew a gana, el a mira hopi reaccion riba Facebook. E ta duna un danki pa e sosten pasobra sin esey, nan no por a yega leu.
