Ku kara serio, pintá na kolónan di kamuflahe, 37 hóben a marcha subi plenchi di Fòrti. Einan Gobernador señora Lucille George-Wout, Promé Minister Eugene Rhuggenaath i Komandante di Marina Real den Karibe Peter Jan de Vin a risibí e partisipantenan ku asin’aki a terminá nan 11 luna di preparashon militar pa drenta den Milisia di Kòrsou (CurMil) i Milisia di Aruba (AruMil).
Ku un rugzak ku ta pisa 30 kilo riba na lomba, e partisipantenan di e asina yamá ‘Elementaire Militaire Vorming’ (EMV) a kana 25 kilometer bini Punda. Riba tono di muzik militar nan a pasa kaya grandi di Otrobanda, krusa brùg di ponton i kana drenta Fòrti.
Einan un grupo di militar i famianan a para apoyá nan den e delaster parti di nan preparashon. Apesar di a kaba di kana 25 kilometer tabatin alegria riba kara di e 37 hóbennan. Despues di a saka pòrtrèt ku gobernador, promé minister i komandante tabata bùrt na mama, tata i demas famia pa felisitá kada unu di e partisipantenan ku nan logro. Ta trata akí di un grupo di hóben di kual 15 ta di Aruba i 22 ta di Kòrsou.
Awor ku nan a terminá nan preparashon di EMV, nan por sigui traha pa ehérsito den e konosido CurMil i AruMil. Un mayoria ta sigui traha den protekshon i vigilansia di kazèrnenan na Kòrsou i Aruba. Nan tin oportunidat pa sigui studia i subi di rango i trabou den ehérsito. Kada unu di nan tin e posibilidat di bai sigui desaroyá den direkshon logístiko, kuido òf sigui pa e preparashon pa bira kòrporal. Na òktober ta start ku un grupo nobo pa e preparashon di ‘Elementaire Militaire Vorming’.
