Diasabra ultimo, Kiwanis Club of Aruba a tene su fiesta anual di gala pa recauda fondo. E evento semper ta sobresali p’e ambiente unico y elegancia cu ta combina cu e tema di e anochi. E aña aki “DUBAI WINE GALA” a surpasa tur espectativa y atrobe a resulta den un exito rotundo. A comberti Renaissance Convention Center den “DUBAI NIGHT” reflehando e glamour, elegancia y sofisticacion den e decoracion esplendido. Por cataloga e ‘wine gala’ di Kiwanis Club of Aruba como un top evento unda cu tur cu a contribui a experiencia un anochi fabuloso.
Un di e highlight di e anochi tabata creacion di e escenarionan di Dubai. Esaki ta prome biaha cu a crea video mapping den Renaissance Convention Center. A instala tambe un tent estilo Arabe cu varios atraccion manera Henna Tattoo painting. Bou di e mesun tent tabatin e virtual reality pa otro experiencia mas di Dubai. Mientras cu paden por a disfruta di e atraccionnan bou di e tent, e parti pafo na entrada por a huma Hookah cu tabaco treci special for di Jordania.
Den Renaissance Convention Center e companianan di biña a presenta nan booth decora den e tema. A conta cu presencia di Arion Wine Company, Divino, Hodgson Trading, Playa Liquor & Bottling Company y Pepia EST. E buffet cu cuminda Arabe prepara pa e chefnan di Renaissancea haya hopi compliment.
Mescos cu tur fiesta di Kiwanis Club of Aruba, musica nunca ta falta! E biaha aki e combinacion musical tabata den man di ‘N Fuzion, Blue Boulevard y Buleria. DJ Edson Tromp a pone esunnan di tur edad goza den style di disco. Pa di tres aña Jean Carlo Espinal a fungi como MC, cu su forma unico di anima a percura pa un ambiente sin igual.
Den e estilo cu Kiwanis Club of Aruba a presenta ‘DUBAI’ a duna esunnan cu a asisti riba e diasabra anochi na e fiesta, e oportunidad pa luci elegancia y estilo cu un toke special den nan vestuario. E premio pa “Best Dressed Couple” a bay pa Lorena Maduro y Addycito Toppenberg. E “door prize”, un travel voucher di 2.500 florin a bay pa Judela Chirino.
Kiwanis Club of Aruba ta gradici tur e agencianan di biña, tur otro sponsors y na tur cu a cumpra carchi pa yuda haci e evento pa recauda fondo uno exitoso e aña aki atrobe.
