Hopi daño material den accidente riba brug

Diadomingo atardi despues di 4:30pm a sosode un accidente na bahada di e brug di Renaissance Aruba Resort & Casino riba L.G. Smith Boulevard. E daño material tabata considerabel. Trafico a pega pisa riba e caminda principal aki.

 

Tabata un accidente di cadena, unda un auto a dal tras di un otro, cu na su turno a bolbe bay dal tras di esun su dilanti. Na tur a keda tres auto kibra dor di e mesun impacto.

Tur tres auto tababata bayendo direccion pariba. Kico a sosode cu esun a dal tras di e otro no ta bon conoci ainda, sea un a brake y e otro no a mira of un di nan tabata riba celular y no a paga tino na trafico su dilanti. A dal bon duro si, pasobra e daño ta papia pa su mes.

Tabatin un di e chauffeurnan cu tabata keha di dolor na su nek. A pidi ambulance pa check e persona aki. Polis a presenta na e sitio pa atende e accidente y specialmente pa maneha e fluho di trafico.