Tur preparacion ta cla pa e prome 100KM Hiking Challenge organisa pa Fundacion Movimiento ta Bida y Fundacion Parke Nacional Aruba. Un reaccion sumamente positivo di e comunidad di Aruba pa e desafio aki, cual a haci cu a alcansa e cantidad maximo di participante.
Fundacion Movimiento ta Bida y Fundacion Parke Nacional Aruba kier recorda tur persona cu a registra cu nan tin te cu diaranson 8 di januari pa paga e costo di participacion. Siguramente esaki ta un actividad cu lo wordo ripiti den futuro y asina mas persona lo haya oportunidad pa participa.
Tur participante di e 100KM Hiking Challenge ta wordo recorda cu e caminata ta sali 6or di mainta y registracion ta cuminsa 5.15 di mainta. Pa e registracion mester trese e carchi di participacion di e desafio. Pa e caminata mester un lus chikito, boter di awa reusabel, un bon sapato y tambe un snacks saludabel. Tambe e organisadornan ta pidi tur participante pa tuma
lift cu otro participante pa asina tin suficiente espacio pa parkeer y tambe reduci e impacto
riba nos medio ambiente.
E 100KM Hiking Challenge no ta un competencia, e ta un desafio personal caminda cu participante lo ta den movecion pa mehora nan salud y tambe disfruta di nos naturalesa riba un paso trankilo. Fundacion Movimiento ta Bida y Fundacion Parke Nacional Aruba ta desea tur participante exito pa completa e 100KM Hiking Challenge.
