Resientemente Minister di Salú, Medio Ambiente i Naturalesa mr. Suzy Camelia-Römer a risibí ing. Malka Moreno Fernandez i prof. Jairo Losado Vega for di Riohacha Colombia.
E dos ekspertonan agrónomo ku a yega di bishitá Kòrsou anteriormente ta laborá na Universidat de la Guajira, Riohacha. Durante e bishitanan anterior, nan a bishitá entre otro diferente agrikultor i a analisá sirkunstanshanan manera klima i struktura di tera di Kòrsou.
Basa riba e nesesidatnan formulá entre otro pa nos agrikultornan, lo desaroyá e siguiente proyektonan:
1. Produkshon di “vermicompost” líkido i sólido pa hasi e tera mas apto pa agrikultura.
2. Un proyekto piloto di “cultivos sin suelo” kual ta un téknika kaminda raisnan di un mata no ta den suela pero den un baki di awa. Un ehèmpel ta e téknika hidropóniko.
3. Un unidat pa mata di fruta.
4. Produkshon di kuminda natural pa bestia di forma sostenibel.
5. Implementá produkshon di tilapia i kabaron mediante “aquaponics”.
E proyektonan aki lo ta riba tereno di Agrarisch en Visserij Beheer (ántes LVV). Minister Camelia- Römer alabes lo inisiá un proyekto di yerbanan di Kòrsou pa promové uzo di di nos mes yerbanan. Ku e proyektonan ariba menshoná Minister Camelia- Römer ta pone énfasis riba oumento di konosementu di nos agrikultornan riba tereno di téknika i teknologia agrario, konforme Programa di Gobernashon 2017- 2021.
