No muchu tempu pasa ministerio di Salú, Medio Ambiente i Naturalesa a duna honor na sra. Gladys van Dal dor di planta un palu na su nòmber na entrada di LVV.
Poko despues komo ‘madrina’ di Selikor el a presensiá introdukshon di un proyekto di resiklahe di plèstik i planta un palu huntu ku nos na Mal Pais. Esakinan ta parti chikí di e hopi kontribushonnan pa yuda konsientisá komunidat di e importansha di medioambiente i naturalesa.
Sra. Camelia Römer ta ekspresá su kondolensha na famia, amigu, konosínan i pueblo di Kòrsou ku e pèrdida aki. Sra. Gladys tabata aktivo tantu riba tereno sosial i emansipashon di hende, komo den área di desaroyo di pais, entre otro e tabata pa hopi aña presidente di fundashon Sede Antia, un fundashon ku a traha riba proyektonan ku fondo Hulandes.
Nos lo keda kòrda Sra. Gladys komo un baluarte riba tereno di desaroyo sosial i spesialmente komo protektor di medio ambiente i naturalesa. Sra. Gladys, drumi dushi.
