Esaki pa motibo cu Hof tambe a tuma otro pruebanan na consideracion. A destrui e prome sentencia. Hof a bisa cu su tarea pa esclarece e hecho y circunstancianan rond di e asesinato di Wiels – mas cu den otro casonan – ta exigi hopi cautela.
Esaki debi cu di e tres personanan responsabel pa esaki, un di nan a wordo mata (Raul Martinez, alias “Bolle”, un a comete suicidio (Luigi Florentina, conoci como Pretu) y e di tres (Elvis Kuwas, conoci como Monster) den transcurso di tempo a haci diferente declaracion of ta cambia esakinan.
Pa e motibo aki Hof a dicidi cu e di tres persona aki, Kuwas, mester wordo scucha durante tratamento di e caso den apelacion. Esey a sosode y e interogacion aki a wordo graba y despues transcribi literalmente pa yega na un analisis optimal di e confiabilidad di tur su declaracionnan.
A base di e analisis aki, Hof a yega na e conclusion cu e pruebanan selecciona ta confiabel y uzabel como prueba den e caso. E pruebanan ta basa principalmente riba 4 pilar: e declaracionnan di Kuwas, un declaracion di e ex Hefe di Siguridad Nacional di Corsou cu a wordo informa di e asesinato via di un informante, declaracionnan di testigonan ocular riba negociacionnan entre e sospechoso y ex Minister di Finanza di Corsou, George Jamaloodin (di loke mester paga) y mensahenan di SMS cu e sospechoso tabatin di dje cu Jamaloodin. Cu esaki a pone un banda un prueba uza door di Hues di prome instancia cual ta e declaracionnan di testigo anonimo B5 y a agrega un prueba cu ta e declaracionnan riba e negociacionnan entre Jamaloodin y e sospechoso.
E acusado Fonseca pa tur e situacionnan acusatorio, no a duna un declaracion acceptabel. Hof kier a haci e sospechoso pregunta riba esaki, pero e no kier a duna ningun declaracion di esaki na Hof.
Hof ta conclui cu e sospechoso a ricibi e ordo pa mata for di Jamaloodin, cu el a negocia cu e politico riba e suma cu mester wordo paga, cu via di Pretu el a busca e “shooter” (Kuwas) y e chauffeur (Bolle) y cu e placa destina pa e dosnan aki a pasa via di Pretu. E rol di e acusado den e plan t’asina importante cu por papia di complicidad den e asesinato di Wiels.
Castigo mas halto
di Prome Instancia a impone un castigo di prizon di 25 aña, pero Hof tabata di acuerdo cu e castigo ey no ta suficiente. E forma di acepta un ordo pa likida un representante di pueblo y sin kier tuma responsabilidad pa esaki, ta exigi nada otro cu e maximo castigo cu ta 30 aña.
Un condena anterior pa contrabanda di droga (di 4 aña) mester wordo kita di e cantidad aki. P’esey Hof a condena e sospechoso conforme e exigencia di Ministerio Publico, un castigo di 26 aña.
Nan tin dos siman di tempo (14 dia) pa apela e sentencia aki si nan kier bay Cassatie na Hoge Raad na Hulanda.